  «Ընդհատված երգը» ֆիլմի ռեժիսոր Արիկ Մանուկյանը հարցազրույց է տվել ադրբեջանական Turan գործակալությանը  10 հունվարի 2011 - 10:32 AMTPanARMENIAN.Net - Ադրբեջանական Turan գործակալությունը հարցազրույց է հրապարակել «Ընդհատված երգը» ֆիլմի ռեժիսոր Արիկ Մանուկյանի հետ: «Ընդհատված երգը» հայ-ադրբեջանական արդի հարաբերությունների մասին պատմող առաջին գեղարվեստական կինոնկարն է: Դրա նկարահանումներն այժմ ընթանում են Մոսկվայում: Պրեմիերային առնչվող հարցին ի պատասխան, Մանուկյանը հայտնել է, որ կինոնկարը պատրաստ կլինի մայիսի վերջին: «Այդ ժամանակ էլ, Մոսկվայի կենտրոնական կինոդահլիճներից մեկում, կանցկացնենք գլխավոր պրեմիերան: Հաշվի առնելով հայ-ադրբեջանական հարաբերությունների հանդեպ միջազգային հանրության հետաքրքրությունը, ծրագրում ենք Ռուսաստանից, Հայաստանից և Ադրբեջանից բացի, «Ընդհատված երգի» պրեմիերան կազմակերպել նաև ԱՄՆ-ի, Ֆրանսիայի, Վրաստանի, Թուրքիայի, Հնդկաստանի, Մերձավոր Արևելքի և բալկանյան մի շարք երկրների մեծ էկրաններին»: Ադրբեջանական կինեմատոգրաֆիստների հետ համատեղ Ղարաբաղյան պատերազմի վերաբերյալ ֆիլմ նկարահանելու մասին հարցին Արիկ Մանուկյանը պատասխանել է, որ նման առաջարկներ կքննարկի միայն Ղարաբաղյան հիմնախնդրի լուծման դեպքում: Կինոնկարի ֆինանսավորման հետ կապված` Արիկ Մանուկյաը նշել է, որ սկզբում այն իրականացվում էր նկարահանող խմբի ղեկավարների` իր և գլխավոր պրոդյուսեր Աշոտ Պողոսյանի անձնական միջոցներով, սակայն ԶԼՄ-ների բուռն արձագանքի շնորհիվ նախագծով հետաքրքրվել են որոշ ներդրողներ, որոնց հետ այժմ բանակցություններ են ընթանում: «Լրացուցիչ ֆինանսական միջոցներն անհրաժեշտ են տարբեր արտասահմանյան երկրներում ֆիլմի պրեմիերաներն ու ցուցադրությունները հավուր պատշաճի կազմակերպելու համար: Մենք պատրաստ ենք դիտարկել նախագծին օժանդակության բոլոր այն առաջարկները, որոնք չեն ենթադրում սյուժեի փոփոխում»,- հայտարարել է նա: Մանուկյանն ադրբեջանական գործակալությանը տված հարցազրույցում կոշտ քննադատության է ենթարկել ադրբեջանական լրատվամիջոցները, որոնք ողջ թափով շարունակում են ֆիլմի վարկաբեկմանն ուղղված հերյուրանքի քարոզարշավը: «Ադրբեջանական ԶԼՄ-ների մղումը` ամեն գնով նսեմացնել այն, ինչն իրականացվում է հայերի կողմից, ժամանակի ընթացքում հանգեցրել է նրան, որ այդ տեղեկատվական ռեսուրսները դադարել են ընկալվել որպես նշանակության արժանի վերլուծությունների կրող»,- ասել է Մանուկյանը: Ռեժիսորը հիշեցրել է նաև Ղարաբաղում գտնվող հայկական հարյուրավոր եկեղեցիների և վանական համալիրների մասին: Նրա խոսքերով, Արցախում շատ հեշտ է «ազգի թշնամու» համբավ ձեռք բերել: Դրա համար անհրաժեշտ է միայն ազատագրված հողերն Ադրբեջանին հանձնելու մասին խոսակցություն սկսել: Իսկ գնալ մի ժողովրդի դեմ, որի ամեն ընտանիքում Ադրբեջանի կազմում ապրել չցանկացող հայրենիքի ջերմեռանդ պահապան է ապրում, նշանակում է նոր պատերազմ սկսել: Միջազգային հանրությունը երբեք այդպիսի ծայրահեղ քայլի չի դիմի: Դրանից բացի, կարևոր է նաև այն հանգամանքը, որ ղարաբաղյան զինուժը վերահսկում է բոլոր ռազմավարական բարձունքները: Դա նշանակում է, որ պատերազմը կլինի անհավասար և արյունահեղ: Նման քայլի երբեք չի դիմի և ինքը` Ադրբեջանը»: Turan գործակալությանը տված Արիկ Մանուկյանի հարցազրույցին ամբողջությամբ կարելի է ծանոթանալ http://www.contact.az/topics_ru.asp?id=128&pb=19&vr=ru&yr=2011&mdn=1 կայքում: Արիկ Մանուկյանը ծնվել է 1984 թվականին Երևանում: 1998-ին ընտանիքի հետ տեղափոխվել է Մոսկվա: 2008-ին ավարտել է Մոսկվայի մշակույթի և արվեստների պետական համալսարանի կինոռեժիսուրայի ֆակուլտետը: Հանդիսանում է չորս գեղարվեստական ֆիլմերի ռեժիսոր` «Խաշ», «Մասնավոր ճամփորդություն», «Մամոչկա» և «Երիտասարդ ցեղ»: «Ընդհատված երգը» Արիկ Մանուկյանի հինգերորդ կինոնկարն է: Սցենարի համաձայն, Ղարաբաղում ռազմական գործողությունների ժամանակ մի հայ ու մի ադրբեջանցի ընկնում են հորը, ուր անճարակությունն ու անելանելի վիճակը հարկադրում են երկխոսության: Հերոսներից յուրաքանչյուրը խոսում է իրեն հուզող ցավերի մասին:   Ուշագրավ Տիգրան Ավինյանն ու Գրեգորի Դուսեն այցելել են պատմական թաղամաս Snap-ը պլատինե երգի կարգավիճակ է ստացել նաև մի քանի այլ երկրներում Հայկական դուդուկի երաժշտությունը ՅՈՒՆԵՍԿՕ-ի ցանկում է ընդգրկվել դեռևս 2008 թ․ Ցուցադրությունը կազմակերպվում է այս երեք ֆիլմերի Պոմպիդու կենտրոնին հանձնման արարողության առիթով   Ամենաընթերցվողը բաժնում |  Վերջին լուրեր Բագրատ սրբազան․ Մեծ հանդիպում ենք նախատեսում բոլոր քաղուժերի հետ` քննարկվելու է վարչապետի թեկնածուի հարցը  Նա նշել է, որ Բաքվի բանտերում պահվող Արցախի ղեկավարության հետ աղ ու հաց են կիսել, բայց հարցը չեն բարձրաձայնումՓաշինյանը՝ Ադրբեջանի հետ խաղաղ գործընթացի մասին. Տիեզերք թռիչքները ևս անիրական էին թվում Նա ընդգծել է, որ ՀՀ ռազմավարությունն ուղղված է տարածաշրջանի հարևանների հետ տնտեսական ինտեգրման խորացմանըՈւրուգվայի Ներկայացուցիչների պալատը միաձայն ընդունել է ապրիլի 24-ը Հայոց ցեղասպանության հիշատակի օր հռչակող օրինագիծը Նախաձեռնությունը Սենատի կողմից հավանության էր արժանացել մայիսի 7-ինՀՀ–ն և Սլովակիան պայմանավորվել են ռազմատեխնիկական գործակցության շուրջ Կարեն Բրուտյանի գլխավորած պատվիրակությունը Բրատիսլավայում է |
