Հակոբ Հակոբյանի ցուցահանդեսը Գաֆէսճեանում «Թանգարանային գիշերվա» մեխը կհանդիսանա

PanARMENIAN.Net - Մայիսի 14-ին Գաֆէսճեան արվեստի կենտրոնում «Թանգարանային գիշերը» կբացվի «Հակոբ Հակոբյան. Հողեղեն գույների երգը» ցուցահանդեսով: Ցուցահանդեսին ներկայացված 28 գեղանկարները և 10 քանդակները ներկայացնում են արվեստագետի ստեղծագործական ուղու տարբեր շրջաններ:

Նկարչի հիշողություններից ներքին տեսողությամբ ծնված սիրո ու պայքարի, կյանքի ու մահվան գաղափարները դրսևորվում են բնության գրկում զետեղված մանեկենների, զգեստների, գործիքների արտահայտիչ ձևական լուծումներով:

«Ինձ համար անակնկալ էր և ուրախություն, որ իմ ստեղծագործությունները ընտրվել են ներկայացվելու Երևանի Ջերարդ Լ. Գաֆէսճեան արվեստի նորաստեղծ կենտրոնում» - նշում է Հակոբ Հակոբյանը հանդիսատեսին ուղղված իր խոսքում:

Հակոբյանի նոր շրջանի գործերը ավելի շատ հագեցած են գործիքներով` պտուտակահանով, աքցանով, մեխերով, որոնք նկարչի երևակայությամբ դարձել են մարդկային կերպարներ: «Ես երեխայի նման խաղում եմ այդ գործիքների հետ և ստեղծում կերպարներ: Դրանք իմ ձեռքով դառնում են ապրող էակներ: Քանդակել սկել եմ 80 տարեկանից հետո»,- լրագրողներին ասաց նկարիչը: Ցուցահանդեսը շարունակվելու է մինչև օգոստոսի 14-ը:

Հակոբ Հակոբյանը ծնվել է1923թ-ի մայիսի 24-ին Եգիպտոսի Ալեքսանդրիա քաղաքում:1952-1954թթ Եգիպտոսի հայկական գաղութի հովանավորությամբ Փարիզում սովորում է Անդրե Լոտտի, ապա Գրան-Շոմիեր ակադեմիայումª Էդուարդ Գոերգի մոտ, 1959-1961թթ մասնակցում է Ալեքսանդրիայի առաջին և երկրորդ բիենալեներին: Եգիպտոսի թանգարանները ձեռք են բերում նրա գործերից: Տաս լավագույն աշխատանքները նվիրում է Հայաստանի ազգային պատկերասրահին: 1962 թ-ից Աշնանն ընտանիքով տեղափոխվում է Հայաստան: Հինգ տարի բնակվում է Լենինականում (այժմ` Գյումրի), ապա տեղափոխվում Երևան: 1996թ-ին Ընտրվում է Ռուսաստանի Դաշնության Գեղարվեստի ակադեմիայի անդամ:

Անհատական ցուցահանդեսներով հանդես է եկել Հայաստանում, Ֆրանսիայում, Ավստրիայում, ԱՊՀ երկրների մի շարք քաղաքներում և ՄերձԲալթիկայում և Մերձավոր Արևելքում: Արժանացել է Հայաստանի պետական մրցանակի և ժողովրդական նկարչի կոչման ոսկե մեդալի Անդրկովկասի առաջին բիենալեում, ԽՍՀՄ պետական մրցանակի, «Մեսրոպ Մաշտոց» պետական շքանշանի,Մայր Աթոռ Սբ. Էջմիածնի «Սբ.Սահակ» և «Սբ. Մեսրոպ» շքանշանների: