Այսօր Դյուսելդորֆում տեղի կունենա «Եվրատեսիլ 2011»-ի եզրափակիչը

14 մայիսի 2011 - 09:51 AMT

PanARMENIAN.Net - Մայիսի 14-ին Դյուսելդորֆում տեղի կունենա «Եվրատեսիլ 2011»-ի եզրափակիչը: Մրցույթի շրջանակներում հանդես կգան 25 երկրների ներկայացուցիչներ: Dusseldorf Arena-ի բեմ առաջինը դուրս կգա Ֆինլանդիայի մասնակից Պարադիս Օսկարը, երկրորդը կերգի Դինո Մերլինը (Բոսնիա և Հերցոգովինա), երրորդը՝ A Friend In London դանիական խումբը:

«Եվրատեսիլ 2011»-ի եզրափակիչ են անցել հետևյալ երկրները` Ֆրանսիա, Իտալիա, Մեծ Բրիտանիա, Գերմանիա, Իսպանիա, Սերբիա, Ռուսաստան, Շվեյցարիա, Վրաստան, Ֆինլանդիա, Իսլանդիա, Հունգարիա, Լիտվա, Ադրբեջան, Հունաստան, Բոսնիա և Հերցեգովինա, Ավստրիա, Ուկրաինա, Մոլդովա, Շվեդիա, Սլովենիա, Ռումինիա, Էստոնիա, Դանիա, Իռլանդիա:

Մայիսի 10-ին Դյուսելդորֆում կայացել է «Եվրատեսիլ 2011» մրցույթի առաջին կիսաեզրափակիչը: Էմմին հանդես է եկել 4-րդ համարի տակ: Էմմին մրցույթում ներկայացրել է «Boom-Boom» երգը: Երգչուհու ելույթից առաջ շատ հայ արտիստներ հավատում էին, որ «Boom-Boom» երգը մտնելու է մրցույթի լավագույն հնգյակ:

Որոշ ԶԼՄ-ներ տեղեկատվություն են տարածել այն մասին, որ Հայաստանը պաշտոնական բողոք է հղել EBU-ին՝ «Եվրատեսիլ-2011»-ի առաջին կիսաեզրափակչի ոչ պատշաճ կազմակերպման վերաբերյալ, որի արդյունքում բազում եվրոպացի հեռուստադիտողներ չեն կարողացել մասնակցել SMS քվեարկությանը: Հայկական պատվիրակության ղեկավար Գոհար Գասպարյանը հերքել է որոշ ԶԼՄ-ների տեղեկատվությունն այն մասին, որ Հայաստանը պաշտոնական բողոք է հղել EBU-ին: