Ըստ Կենտրոնական բանկի հրապարակած «Ֆինանսական հատվածի ցուցանիշների վերաբերյալ առևտրային բանկերի եռամսյակային հարցման ամփոփման», առևտրային բանկերը կանխատեսում են դրամի արժեզրկում դոլարի համեմատ: Մասնավորապես, սեպտեմբերին ՀՀ դրամը կդրսևորի արժեզրկման միտումներ և միջին հաշվով ՀՀ դրամ-ԱՄՆ դոլար փոխարժեքը կկազմի 372.95 դրամ: Խոշորագույն 15 բանկերի սպասումներով 2010թ սեպտեմբերին փոխարժեքը կկազմի 373.01 դրամ:

Հուլիսի 19-ին մեկնարկեցին Հայաստանի ու Եվրամիության միջև Ասոցիատիվ համաձայնագրի ստորագրման շուրջ բանակցությունները: Բանակցությունների մեկնարկը հստակ նշում է Երևանի, Թբիլիսիի ու Բաքվի հետ Բրյուսելի առաջիկա համագործակցության շրջանակներն ու ձևաչափը: Իհարկե, Հայաստանի շարքային քաղաքացու համար դժվար կլինի միանգամից հասկանալ, թե ինչու ԵՄ-ն «Արևելյան գործընկերության»` բավական թարմ նախաձեռնության հետ զուգահեռ որոշում է տարածաշրջանում մեկնարկել ևս մեկ ծրագիր: Ասոցիատիվ համաձայնագիրը բոլորովին չի նշանակում, որ Եվրոպան լայնորեն բացում է իր դռներն ու շտապում իր շարքերն ընդունել նոր անդամների: Հաշվի առնելով հետճգնաժամային իրադրությունը ԵՄ անդամ երկրներում` Բրյուսելում սկսեցին զգուշավորությամբ վերաբերվել «եվրոպական ակումբին» միանալու` արևելյան հարևանների ձգտմանը: Ամենայն հավանականությամբ, հենց դրանով կարելի է բացատրել Թուրքիայի հիասթափությունը ԵՄ-ին անդամակցելու գործընթացից: Չնայած, որ Թուրքիան արդեն ավելի քան 45 տարի հանդիսանում է Եվրոպական Միության «ասոցացված անդամը», Անկարային հստակ հասկացրեցին, որ այդ կազմակերպությանը լիարժեք անդամակցելու գործում մոտ ապագայում չարժե հույսեր փայփայել: Բայց, այնուամենայնիվ, դա կողմերին չխանգարեց Մաքսային միության մասին համաձայնագիր կնքել և ակտիվորեն համագործակցել տնտեսության ու առևտրի ոլորտում:

Ըմբշամարտ- Հուլիսի 21-ին Բուդապեշտում (Հունգարիա) ըմբշամարտի աշխարհի երիտասարդական առաջնության հունա-հռոմեական ըմբշամարտում Արթուր Ալեքսանյանը (84 ք/կ) դարձավ աշխարհի չեմպիոն: Նա հաղթանակ է տարել 5 ըմբշամարտիկների դեմ մենամարտերում և մինչ հիմնական ժամանակի ավարտը առանց դժվարության հաղթեց Սեյ Յոլա Լինիին (Հարավային Կորեա): Մինչ այդ 60 ք/կ-ում բրոնզե մեդալ էր նվաճել Ալեքսան Միքայելյանը:

Հայաստանում քաղաքական իրադարձություններն անցյալ շաբաթ սկսվեցին Հայոց համազգային շարժման ու Արմենական Ռամկավար-Ազատական կուսակցությունների համագումարներից: Հուլիսի 17-ին Երևանում կայացավ Հայոց համազգային շարժման 16-րդ համագումարը: Ելույթ ունենալով համագումարում` Հայաստանի առաջին նախագահ Լևոն Տեր-Պետրոսյանը հայտնեց, որ առանց ղարաբաղյան հակամարտության և հայ-թուրքական հարաբերությունների կարգավորման Հայաստանն անվտանգության, տնտեսական զարգացման և ժողովրդագրական վիճակի բարելավման հեռանկար չունի: Նա համոզմունք հայտնեց, որ որ հայ-թուրքական հարաբերությունների և ղարաբաղյան կարգավորման լուծման բանալին գտնվում է Ռուսաստանի ձեռքերում:

Անցյալում մնացին կինոյի տոնի յոթ անմոռանալի օրերը` հայտարարված են հաղթողները, հանձնված են գլխավոր և պատվավոր մրցանակները: Երևանը ճանապարհեց իր թանկագին հյուրերին, որոնք հավաքվել էին Հայաստանի մայրաքաղաքում ամբողջ աշխարհից` մասնակցելու համար «Ոսկե ծիրան» VII միջազգային կինոփառատոնին: Սա էր անցած շաբաթվա գլխավոր մշակութային իրադարձությունը: Փառատոնի շրջանակներում ցուցադրվեց 120 կինոնկար 5 մրցանակային անվանակարգերում, տեղի ունեցան հայտնի ռեժիսորների ֆիլմերի հետահայաց ցուցադրություններ` ռեժիսորների մասնակցությամբ:

Թբիլիսիում Մուղնու Սուրբ Գևորգ ավերված եկեղեցու տարածքում շարունակվում են գրունտի հետազոտությունները, որոնք աստիճանաբար վերածվել են հնագիտական պեղումների: Հնագիտա-երկրաբանական հետազոտությունների արդյունքում հայտնաբերվել են հենասյուները: Գտածոյի հիման վրա վրացի գիտնականները ենթադրել են, որ կառույցը բազիլիկ է: Մասնավորապես, հուլիսի 11-ին վրացական «Մաեստրո» հեռուստաալիքի եթերում Ազգային թանգարանի Հնագիտական կենտրոնի աշխատակից Գուրամ Միրցխուլավան հաղորդել է, որ 13-14-րդ դարերում հիմնադրված վրացական եկեղեցի է հայտնաբերվել:

Հուլիսի 12-ին Արցախի Հանրապետության նախագահ Բակո Սահակյանի, վարչապետ Արա Հարությունյանի և «Ղարաբաղ տելեկոմ» ՓԲԸ տնօրեն Ռալֆ Յիրիկյանի հանդիպման ժամանակ քննարկվել են Արցախի «Ղարաբաղ տելեկոմ» ընկերության ներդրումային քաղաքականությանը վերաբերող հարցեր: Կողմերը վերանայել են սակագների, սոցիալական ոլորտում բարեգործական ծրագրերի իրականացմանն առնչվող հարցեր: Այս մասին հաղորդել է ԼՂՀ նախագահի գլխավոր տեղեկատվական վարչությունը: