Հայ-թուրքական Արձանագրություններից պաշտոնապես հրաժարվելուց հետո Թուրքիան կրկին սկսել է խոսել ղարաբաղյան հակամարտության մասին՝ այն պարտադիր պայման համարելով հայ-թուրքական հարաբերությունների կարգավորւման համար: «ՄԿ»-ին տված հարցազրույցում նախագահ Աբդուլլահ Գյուլը հայտարարել է, որ այդ երկու հարցերը կապված են միմյանց հետ, և Թուրքիայի կողմից Ադրբեջանի խնդրանքով 1993-ին փակված սահմանի բացումն ուղղակիորեն կապված է ղարաբաղյան հակամարտության հետ, ավելի ճիշտ, դրա ադրբեջանական տարբերակի:

Ընթացիկ ամսվա սկզբին Fitch Ratings գործակալությունը հաստատել է Հայաստանի էմիտենտի դեֆոլտի երկարաժամկետ վարկանիշը BB- մակարդակի վրա՝ կանխատեսումը «կայուն»: Fitch Ratings միջազգային վարկանիշային գործակալության զեկույցում Հայաստանի պետական պարտքը գնահատվում է որպես կառավարելի, բնորոշ նմանատիպ խմբի երկրների համար: Չնայած, որ այն աճել է վերջին երկու տարում, սակայն, գործակալությունը նրա հետագա կառավարման հետ կապված խնդիրներ չի տեսնում: 2011թ. հունիսի 30-ի դրությամբ Հայաստանի ընդհանուր պետական պարտքը կազմում է 1455,4 մլրդ դրամ, որից արտաքին պարտքը կազմում է 1269,8 մլրդ դրամ, ներքին պարտքը՝ 185,6 մլրդ դրամ:

Հուլիսի 19-ին Պյատիգորսկում (Ռուսաստան) ավարտվեց Հյուսիսկովկասյան երկրորդ երիտասարդական համաժողովը՝ «Մաշուկ 2011», որը երկու շաբաթով միավորեց գրեթե 2.5 հազար երիտասարդների ՌԴ Հյուսիսային Կովկասի սուբյեկտներից, ինչպես նաև Հայաստանից, Ադրբեջանից, Վրաստանից, Ուկրաինայից, Աբխազիայից և Հարավային Օսեթիայից ժամանած հյուրերի: Եվրասիական հետազոտություների հայկական մասնաճյուղի շնորհիվ առաջին անգամ համաժողովի աշխատանքին մասնակցեց պատվիրակություն Հայաստանից, որի կազմում էին բլոգեր Տիգրան Սարգսյանը, PanARMENIAN.Net-ի թղթակից Հայկ Խալաթյանը և Հայաստանում Ռոսհամագործակցության աշխատակից Եկատերինա Ժիրենկոն: