Վիկ Դարչինյանը երրորդ անգամ անընդմեջ աշխարհի չեմպիոն է դարձել տարբեր քաշային կարգերում

PanARMENIAN.Net - Այդպիսով, 34-ամյա Վիկ Դարչինյանը դարձավ աշխարհի չեմպիոն երրորդ քաշային կարգում անընդմեջ (մինչ այդ նա աշխարհի չեմպիոն է դարձել առաջին թեթև քաշում` մինչև 52,2կգ և թեթևագույն քաշային կարգում` մինչև 50,8 կգ): Դարչինյանի մարզիչ Վազգեն Բադալյանը PanARMENIAN.Net ի թղթակցի հետ զրույցում ասել է, որ Բարսելոնայի հետ մենամարտը Դարչինյանի համար հեշտ չէր: «Վիկի ձախ ձեռքի բութ մատը ջարդված էր, բայց նա այդ մասին ոչինչ չէր ասել բժիշկներին, քանի որ ցանկանում էր անցկացնել մենամարտը և նվաճել IBO վարկածով աշխարհի չեմպիոնի տիտղոսը»,- ասել է Բադալյանը: Հաջորդ մենամարտը Դարչինյանը կանցկացնի օգոստոսի 21-ին Ռաֆայել Մարկեսի (Մեքսիկա) հետ:

Իսկ բրիտանացի բռնցքամարտիկ Կառլ Ֆրոչը գտնում է, որ «Super Six» մրցաշարի երրորդ շրջանի Արթուր Աբրահամի դեմ մենամարտը պետք է անցնի Նոթինգհեմում և վստահ է, որ իր փրոմոութեր Միկ Հեննեսին կկարողանա հոգալ այդ մասին: Ֆրոչն ասել է, որ եթե համաձայնության չգա Աբրահամի հետ, դա չի նշանակի, թե նա լքելու է մրցաշարը: «Ուղղակի մենամարտը պետք է անցնի չեզոք տարածքում` Ամերիկայում կամ Անգլիայում: Այլ տարբերակներ ես չեմ դիտարկում: Ես չեմ մեկնի Գերմանիա կամ Շվեդիա կամ Նոթինգհեմից դեպի արևելք, քանի որ այնտեղ ես հնարավորություն չեմ ունենա հաղթելու ըստ միավորների: Իսկ Աբրահամի փրոմոութեր Վիլֆրեդ Զաուերլենդը պնդում է, որ մենամարտը անցկացվի տնտեսապես առավել շահավետ վայրում և աննպատակահարմար է համարում մեկնել ԱՄՆ, որտեղ երկրպագուներն այնքան էլ չեն ձգտում տեսնել երկու եվրոպացի բռնցքամարտիկների մենամարտը:

Ֆուտբոլ. Մայիսի 20-ին Տալինում «Կադրիորգ» մարզադաշտում ֆուտբոլի Հայաստանի երիտասարդական հավաքականը 2011-ի Եվրոպայի առաջնության երկրորդ խմբում հանդիպեց էստոնիայի հավաքականի հետ: Խաղն ավարտվեց 2:3 հաշվով Հայաստանի հավաքականի հաղթանակով: Երկու գոլի հեղինակ դարձավ «Փյունիկի» հարձակվող Գևորգ Ղազարյանը: Հայաստանի հավաքականի երրորդ գնդակը խփեց Դավիդ Մանոյանը: Հակառակորդի թիմում աչքի ընկան Կայմար Սաագը, որը հավասարեցրեց հաշիվը, իսկ երկրորդ գնդակը 81-րդ րոպեին խփեց Կեն Կալաստեն, սակայն հաղթեց Հայաստանի հավաքականը:

Հաջորդ հանդիպումը Հայաստանի հավաքականն անցկացնելու է Երևանում օգոստոսի 11-ին Վրաստանի հավաքականի հետ: Հայաստանի երիտասարդական հավաքականի գլխավոր մարզիչ Ֆլեմինգ Սերիցլևը գոհ է իր սաների խաղից և ուրախ է, որ հայ ֆուտբոլիստները հաղթեցին` ցույց տալով գեղեցիկ ու արժանի խաղ: «Խաղը մեզ համար շատ կարևոր ու բարդ էր: Ի տարբերություն էստոնացիների, մենք հարձակողական ֆուտբոլ ցույց տվեցինք և կարճ պասերով խաղացինք: Մխիթարյանն ու Բադալյանը գնդակը խաղարկում էին դաշտի կենտրոնում, իսկ Ղազարյանն ու Մալաքյանը` ֆլանգերով: Եվ նման փոխգործակցությունը գերազանց արդյունք տվեց»,- ասել է Սերիցլևը:

Իսկ Հայաստանի ազգային հավաքականը մայիսի 25-ին Վազգեն Սարգսյանի անվան հանրապետական մարզադաշտում հանդիպեց Ուզբեկստանի ֆուտբոլի հավաքականի հետ: Հանդիպումն ավարտվեց հայ ֆուտբոլիստների հաղթանակով` 3:1 հաշվով: Առաջին գնդակը խփեց Դոնեցկի «Մետալուրգի» ֆուտբոլիստ Հենրիկ Մխիթարյանը, իսկ Էդգար Մանուչարյանը դարձավ կրկնակի գոլի հեղինակ: Հյուրերի թվում աչքի ընկավ Ալեքասնդր Հենրիխը:

Խաղից հետո ՀՀ հավաքականի գլխավոր մազրիչ Վարդան Մինասյանը, որի ղեկավարությամբ հավաքականն իր առաջին խաղն անցկացրեց, ասել է, որ գոհ է խաղից: «Առաջին խաղակեսում մենք գերազանց խաղացինք, սակայն երկրորդ խաղակեսում ինչ-որ բան չստացվեց: Այսօրվա դրությամբ մեզ համար կարևոր է խաղի արդյունքը, սակայն առջևում մենք դեռ շատ աշխատանք ունենք»,- ասել է Մինասյանը:

Մայիսի 26-ին FIFA-ն (Ֆուտբոլի միջազգային ֆեդերացիան) հրապարակեց մարտ ամսվա ազգային հավաքականների հերթական վարկանիշային ցուցակը: Վերջին վարկանիշի հետ համեմատած, որը ներկայացվել էր ապրիլին, Հայաստանի հավաքականը իջել է 1 հորիզոնականով: Հիմա հավաքականը 311 միավորով 100-րդ տեղում է:

Ծանրամարտ. Ավարտվել է ծանրամարտի Եվրոպայի պատանեկան առաջնությունը, որը տեղի է ունեցել մայիսի 17-23-ը Վալենսիայում (Իսպանիա): Հայաստանի հավաքականի վերջին երկու մեդալները նվաճել են Միշա Մուրադյանը և Գոռ Մինասյանը +94 քաշային կարգում: Մինասյանը «երկամարտի» արդյունքում, բարձրացնելով 340 կգ, նվաճել է արծաթե մեդալ, իսկ Մուրադյանը, բարձրացնելով 321 կգ, զբաղեցրել է 3-րդ տեղը: Այս քաշային կարգում չեմպիոն է դարձել Լաշա Տալախաձեն (Վրաստան) (354 կգ):

Այսպիսով, Հայաստանի հավաքականի 8 ներկայացուցիչներից 5-ը մեդալներ են նվաճել: Սմբատ Մարգարյանը (56 ք/կ) և Վլադիկ Կարապետյանը (62 ք/կ) դարձել են Եվրոպայի չեմպիոններ, իսկ Իզաբելլա Յալյանը (53 ք/կ) նվաճել է Եվրոպայի փոխչեմպիոնի կոչում:

Րաֆֆի Մելիքյանը և Արեն Ներսիսյանը (77 ք/կ) ԵԱ-ում զբաղեցրել են համապատասխանաբար 5-րդ և 6-րդ տեղերը, իսկ Համլետ Պողոսյանը` (94 ք/կ) 5-րդ տեղը: Հայաստանի հավաքականը թիմային հաշվարկով երկրորդ տեղը զբաղեցրեց` զիջելով միայն Ռուսաստանի հավաքականին:

Մայիսի 23-ի գիշերը «Զվարթնոց» օդանավակայանում Վալենսիայից վերադարձող Հայաստանի ծանրամարտի պատանեկան հավաքականին դիմավորելու ժամանակ սրտի կաթվածից հանկարծամահ եղավ Հայաստանի ծանրամարտի ազգային հավաքականի գլխավոր մարզիչ, ՀՀ ֆիզկուլտուրայի և սպորտի վաստակավոր գործիչ և մարզիչ, գյումրեցի 51-ամյա Աշոտ Մխիթարյանը: Նա 2006 թվականից գլխավորում էր ՀՀ ծանրամարտի ազգային հավաքականը, որը Պեկինի օլիմպիական խաղերից հայրենիք վերադարձավ երեք բրոնզե մեդալով: Ա. Մխիթարյանի ղեկավարությամբ հայ ծանրորդները տասնյակ հաղթանակներ են տոնել աշխարհի, Եվրոպայի առաջնություններում և միջազգային բարձրագույն կարգի այլ մրցաշարերում:

Ըմբշամարտ. Մայիսի 18-23-ին Լեհաստանի Պոզնան քաղաքում անցկացվեցին ազատ և հունահռոմեական ըմբշամարտի պատանեկան միջազգային մրցումներ, որի ընթացքում խաղարկվեցին սինգապուրյան Օլիմպիական խաղերի ուղեգրեր: Հունահռոմեական ըմբշամարտում 85 քաշային կարգում Վարոս Պետրոսյանը դարձավ արծաթե մրցանակակիր, իսկ Արտակ Հովհաննիսյանը 46 կգ ք/կ-ում արծաթ է նվաճել ազատ ըմբշամարտում:

Օգոստոսի 14-26-ին երկու մարզիկներն էլ մասնակցելու են Սինգապուրում տեղի ունեցող օլիմպիական պատանեկան խաղերին: Հայաստանի մեկ այլ ներկայացուցիչ` Գևորգ Համբարձումյանը (76 կգ ք/կ) գրավել է 3-րդ տեղը:

Շախմատ. Մայիսի 24-ին Ռուսաստանի Աստրախան քաղաքում շախմատի տղամարդկանց Գրան պրիի վերջին` 13-րդ տուրում հայ գրոսմայստեր Վլադիմիր Հակոբյանը հանդիպեց ռուսաստանցի Դմիտրի Յակովենկոյի հետ, պարտիան ավարտվեց ոչ ոքի: Հակոբյանը 5,5 միավորով զբաղեցրեց վերջին տեղը մրցաշարային աղյուսակում, իսկ Յակովենկոն 7 միավորով 3-րդ տեղում է: Գրան պրիի հաղթող դարձավ Պավել Էլյանովը 8 միավորվ, 2-րդ տեղում է Ռուսլան Պոնոմարյովն Ուկրաինայից 7 միավորով:

Իսկ մայիսի 24-ին շախմատի ԱՄՆ առաջնությունում Վարուժան Հակոբյանը 5 միավորով զբաղեցրեց 7-րդ տեղը, Մելիքսեթ Խաչիյանը և Լևոն Ալթունյանը` 3.5 միավորով համապատասխանաբար 20-րդ և 21-րդ տեղերը: Չեմպիոն դարձավ Գատա Կամսկին:

Հանդբոլ. Հայաստանի հանդբոլի երիտասարդական հավաքականն Բելգրադում մասնակցել է մինիչև 18 տարեկանների Եվրոպայի առաջնության ընտրական մրցաշարին: 8-րդ խմբում, որտեղ հանդես են գալիս հայ հանդբոլիստները, ընդգրկված են նաև Սերբիայի, Բուլղարիայի ու Հունաստանի հավաքականները: Բոլոր 3 խաղերում Հայաստանը զիջեց մրցակիցներին: Սերբիայի հավաքականի հետ խաղն ավարտվեց 52:9 հաշվով, իսկ Բուլղարիայի ու Հունաստանի հավաքականներին հայ հանդբոլիստները զիջեցին համապատասխանաբար 12:3 և 8:38 հաշվով:

Այդպիսով, ՀՀ հավաքականն առանց միավորի վերջին տեղն է զբաղցենում 8-րդ խմբում: Առաջին տեղում է Սերբիայի հավաքականը, որն էլ իրավունք ստացավ շարունակել պայքարը Եվրոպայի չեմպիոնի տիտղոսի համար:

Հոկեյ. Կայացավ Հոկեյի միջազգային ֆեդերացիայի (IIHF-ը) կոմիտեի նիստը, որում որոշվել է որակազրկել Հայաստանի հոկեյի հավաքականին անորոշ ժամանակով, հաղորդում է IIHF պաշտոնական կայքը: Հայաստանի հավաքականն աշխարհի առաջնությունում հանդես է գալիս 3-րդ դիվիզիոնում: Այս տարի աշխարհի առաջնության ժամանակ թիմի կազմում հանդես էին գալիս մի քանի ամերիկահայ մարզիկներ: Հայաստանի Հոկեյի ֆեդերացիան նրանց մասին ոչ ստույգ տվյալներ էր հաղորդել: Որակազրկման ժամկետը կորոշվի ավելի ուշ: