Բուլղարիայում անցկացվեցին Հայկական մշակույթի օրեր

PanARMENIAN.Net - Սեպտեմբերի 1-5-ը Բուլղարիայում տեղի ունեցան Հայ մշակույթի օրեր, որոնց բացման պաշտոնական արարողությանը մասնակցեցին ՀՀ մշակույթի նախարար Հասմիկ Պողոսյանը և նրա գլխավորած պատվիրակությունը:

Ինչպես հայտնում է ՀՀ մշակույթի նախարարության պաշտոնական կայքը, սեպտեմբերի 1-ին Պլովդիվ քաղաքի ամառային թատրոնում ելույթ ունեցան Հայաստանի ֆիլhարմոնիայի ժողովրդական գործիքների և «Բարեկամություն» պարարվեստի պետական համույթները:

Սոֆիայի կինոյի տանը սեպտեմբերի 2-ին ցուցադրվեց կինոռեժիսոր Վիգեն Չալդրանյանի «Ձայն բարբառոյ…» խաղարկային կինոնկարը: Սեպտեմբերի 3-ին Սոֆիայի Ազգային օպերային թատրոնում մեծ գալա համերգով իրենց արվեստը ցուցադրեցին արվեստի հայ գործիչները:

Համերգին ներկա էին ՀՀ մշակույթի նախարար Հասմիկ Պողոսյանը, Բուլղարիայի մշակույթի փոխնախարար Միտկո Տոդորովը, Բուլղարիայում ՀՀ արտակարգ և լիազոր դեսպան Արսեն Սհոյանը, բարձրաստիճան հյուրեր, դիվանագիտական առաքելությունների ղեկավարներ, տեղի հայ համայնքի բազմաթիվ ներկայացուցիչներ:

Սեպտեմբերի 4-ն «Սբ.Կիրիլ և Մեֆոդիի» անվան ազգային գրադարանում բացվեց «Երևանը ՅՈՒՆԵՍԿՕ-ի կողմից հռչակված 2012թ. գրքի համաշխարհային մայրաքաղաք և հայ գրատպության 500-ամյակը» խորագրով հայ հնատիպ գրքերի ցուցահանդեսը, որտեղ և տեղի ունեցավ «Մարկո Կրալ» էպոսի հայերեն և Լևոն Շանթի «Կայսր» պատմական դրամայի բուլղարերեն հրատարակությունների շնորհանդեսը:

Միջոցառմանը ողջույնի խոսքով հանդես եկավ Բուլղարիայի Հանրապետության փոխնախագահ Մարգարիտա Պոպովան, որն իր ելույթում նշեց հայ գրականության համար գրատպության գյուտի նշանակությունը և կարևորեց բուլղարական բազմաթիվ գրքերի և ամսագրերի հրատարակումը Կոստանդնուպոլսի հայկական տպարաններում: Ելույթներով հանդես եկան ՀՀ մշակույթի նախարար Հասմիկ Պողոսյանը, Բուլղարիայի Հանրապետության փոխնախարար Միտկո Տոդորովը, Բուլղարիայում ՀՀ արտակարգ և լիազոր դեսպան Արսեն Սհոյանը, Հայաստանի և Բուլղարիայի ազգային գրադարանների տնօրեններ Բորյանա Խրիստովան և Տիգրան Զարգարյանը: