Հետհանգստյան սթրեսից խուսափելու համար անհրաժեշտ է գնումների գնալ, օրինակ` աշխատանքի համար նոր հագուստ գնել: Նման խորհուրդ այսօր լրագրողների հետ հանդիպմանը տվեց հոգեբանական գիտությունների դոկտոր Ռուբեն Պողոսյանը:
«Հանգիստն այն իրավիճակն է, երբ մարդը ոչ մի բանի նկատմամբ պատասխանատվություն չի ունենում: Այդ պատճառով էլ հանգստից աշխատանքի անցնելը մարդու համար ավելի դժվար է, քան հակառակը», - ասաց հոգեբանը:
Բանախոսը նշեց, որ հոգեբաններն այդ շրջանն անվանում են «բուֆերային», որում մարդը լինում է աշխատանքի անցնելուց հետո, մոտավորապես, իր հանգստի կեսը: Ըստ Պողոսյանի` հետհանգստյան սթրեսն ավելի արտահայտված է լինում ստեղծագործական աշխատանք կատարող մարդկանց ու երեխաների մոտ:
«Երեխաների մոտ այդ անցումն ուղղակի սարսափելի է լինում, քանի որ նրանք ավելի տպավորվող են», - նշեց մասնագետը:
Հոգեբանը նաև խորհուրդ տվեց հետհանգստյան սթրեսից շուտ դուրս գալու համար մինչ աշխատանքի անցնելը հետզհետե հանդիպել աշխատանքային ընկերներին, բայց ոչ աշխատանքային միջավայրում: