Նոյեմբերի 13-ին Սլավոնական համալսարանում կայացել է Լևոն Մկրտչյանի անվան մրցանակի շնորհում հանրահայտ ռուս գրող, հրապարակախոս և կինոդրամատուրգ Կիմ Բակշիին` Հայաստանի և հայկական մշակույթի մասին գրքերի շարքի համար, PanARMENIAN.Net-ին հաղորդել են համալասարանի մամուլի ծառայությունում:
Հայաստանի Գրողների միության նախագահ Լևոն Անանյանն ընդգծել է, որ Կիմ Բակշիի`վերջերս հրապարակված «Արցախի մշակութային գանձերը» գրքում, արտացոլված են այդ երկրամասի նկատմամաբ հեղինակի անսովոր սերը, նվիրվածությունը, գիտելիքները:
«Ամեն մեկը չէ, որ կարող է արժանանալ Լևոն Մկրտչյանի անվան մրցանակի: Մենք Բակշիին կոչում ենք հայ ժողովրդի ռուս զավակ, ինչպես նաև Ռուսաստանում հայկական մշակույթի դեսպան: Նա իսկապես արժանի է մրցանակին, որը և ուրախությամբ շնորհում եմ նրան»,-ասել է Անանյանը:
Նա նաև հաղորդել է, որ ՀՀ նախագահի հրամանով Բակշին արժանացել է Պատվո Շքանշանի` հայ-ռուսական հարաբերությունների ամրապնդման գործում ունեցած ավանդի համար:
Միջոցառման ընթացքում ընթերցվել են հատվածներ գրողի լավագույն ստեղծագործություններից, որոնցում նա իր հիացմունքն է արտահայտում հայկական մշակույթի մասին և խոստովանում իր սերը հայ ժողովրդի նկատմամբ:
Կիմ Բակշին առաջին հեղինակն է, ով ազգությամբ հայ չէ, և որին շնորհվում է այս մրցանակը: