ԱՄՆ պետքարտուղարը չի՞ տիրապետում հատուկ ծառայությունների տվյալներին

PanARMENIAN.Net - Ելույթ ունենալով ԱՄՆ Սենատի արտաքին գործերի կոմիտեի առջև՝ Ջոն Քերին ասել է, որ սիրիական ընդդիմության շարքերում ավելանում են չափավոր հայացքների տեր մարդիկ, որոնցից շատերը սկսել են շահագրգռվածություն դրսևորել զարգացման ժողովրդարական ուղու վերաբերյալ:

Սակայն, ըստ հատուկ ծառայությունների աշխատակիցների ու ՈԿԿ փորձագետների, իսլամիստ ծայրահեղականների ազդեցությունը Սիրիայում նախկինի պես մեծ է, իսկ նրանց գործողությունները աչքի են ընկնում հստակությամբ ու համախմբվածությամբ:

Ծայրահեղականներն ընդլայնել են իրենց ազդեցության գոտին Սիրիայի շրջաններից շատերում, այդ թվում նաև Հոմս և Իդլիբ գավառներում՝ ստանալով այլ երկրների մոջահեդների աջակցությոնն, որոնք ցանկանում են շարիաթի օրենքները հաստատել Սիրիայում:

Ըստ որոշ փորձագետների, ԱՄՆ ռազմական միջամտությունը ձեռնատու կլինի մոջահեդներին և էլ ավելի կխորացնի սիրիական հակամարտությունը, որը 2011թ. ի վեր շուրջ 100 հազար մարդու կյանք է խլել:

Օգոստոսի 21-ին մի շարք ԶԼՄ-ներ հայտնեցին սիրիական կառավարության կողմից Դամասկոսի արվարձանում քիմիական զենքի կիրառման մասին, որին զոհ գնաց 600 մարդ: Ամերիկյան կողմը պնդում է, որ անհերքելի ապացույցներ ունի, որ մեղավորը կառավարական ուժերն են: Ենթադրյալ գրոհի վայրում աշխատում էր փորձագետների խումբը, որը դեռ չի հրապարակել հետաքննության արդյունքները: Միևնույն ժամանակ ՄԱԿ գլխավոր քարտուղար Պան Գի Մունը շնորհակալություն է հայտնել Սիրիայի կառավարությանը փորձագետների աշխատանքին աջակցելու համար: Օգոստոսի 30-ին նախագահ Օբաման օրենսդիրներին հարցում ուղարկեց՝ ռազմական գործողության թույլտվություն ստանալու ակնկալիքով: