Իրանը պատրաստ է աջակցել, որպեսզի Սիրիայից հեռանան այնտեղ մարտնչող օտարերկրյա ուժերը: Այդ մասին երեքշաբթի օրը հայտարարել է Իրանի ԱԳ նախարար Մոհամմադ Ջավադ Զարիֆը: Պատասխանելով Լիբանանի շիաների «Հեզբոլլահ» շարժման վրա Իրանի ազդեցության մասին հարցին՝ նա նշել է, որ իրանցիներն ու Լիբանանի շիաները կհեռանան Սիրիայից, եթե երկիրը լքեն սունի գրոհայինները:
«Մենք պատրաստ ենք բոլոր օտարերկրյա ուժերի հեռանալուն Սիրիայից: Մենք պատրաստ ենք, որպեսզի բոլորն, ովքեր ազդեցություն ունեն, պայքարեն, որ բոլոր ոչ սիրիացիները հեռանան երկրից»,-ասել է Մոհամմադ Ջավադ Զարիֆը, հայտնում է euronews-ը:
Սիրիայում արդեն երկու տարուց ավելի է շարունակվում են կառավարական ուժերի բախումները զինված ընդդիմության հետ: Ըստ ՄԱԿ տվյալների, Սիրիայում հակամարտության զոհերի ընդհանուր թիվը հասնում է 150 հազարի: Սիրիական իշխանությունները հայտարարում են, որ իրենց դիմակայում են լավ զինված գրոհայիններ:
