Սիրիայում կռվող իսլամիստները զրկվել են Մեծ Բրիտանիայի հպատակությունից

PanARMENIAN.Net - Մեծ Բրիտանիայի ՆԳՆ-ն հպատակությունից զրկել է իսլամիստներին, որոնք մեկնել են պատերազմելու Սիրիայում: Ինչպես հայտնում է ԻՏԱՐ-ՏԱՍՍ-ը, The Independent-ի վրա հղումով, այդ քայլերը թույլ կտան նվազեցնել անվտանգության սպառնալիքներն երկրի տարածքում: Գործող ներգաղթային օրեսնդրությունը թույլ է տալիս իշխանություններին զրկել մարդուն հպատակությունից, եթե «վերջինս սպառնալիք է հանրության համար»: Այդ միջոցներն առաջին հերթին վերաբերում են կրկնակի քաղաքացիություն ունեցող հնարավոր ահաբեկիչներին:

Ընթացիկ տարվա հունվարից նոյեմբեր թագավորության հպատակությունից զրկվել է արդեն 30 մարդ և այդ թիվն աճում է: «Քաղաքացիությունն արտոնություն է, ոչ թե իրավունք, և ՆԳՆ-ն կզրկի քաղաքացիությունից բոլոր նրանց, ում հանդեպ դա բխում է հանրության շահերից»,-ասել են ՆԳՆ-ում: Անցած շաբաթ բրիտանական Sky News հեռուստաալիքը եթեր է հեռարձակել մի ռեպորտաժ, որի համաձայն Սիրիայում հակակառավարական ուժերի թվում գործում է «բրիտանացի ջիհադիստների մի ամբողջ բրիգադ»:

Սիրիայում կռվող «Ալ Քայիդայի» և ահաբեկչական այլ խմբերի գրոհայիններին բրիտանական խորհրդարանը ճանաչել է որպես ժամանակակից ամենագլխավոր ահաբեկչական սպառնալիքներից մեկը: Հատուկ ծառայությունները մտահոգված են, որ ծայրահեղականները կարող են օգտվելով «ամենաթողության մթնոլորտից» Սիրիայում, «վերադառնալով տուն» հարձակումներ գործել Արևմուտքում: