Ադրբեջանը վախենում է Ռուսաստանի «հինգերորդ շարասյունից»29 ապրիլի 2014 - 14:06 AMT PanARMENIAN.Net - Ռուսական ներխուժումը Ղրիմ ու Ուկրաինայի այդ տարածաշրջանի հետագա բռնակցումը Ռուսաստանին Կրեմլի «հինգերորդ շարասյան» ակտիվացման պատճառ դարձան ամբողջ հետխորհրդային տարածքում: Ինչպես գրում է Vesti.az-ը, հնարավոր ռուսական ներխուժման սպառնալիքի վերաբերյալ մտավախությունները հետխորհրդային հանրապետությունների համար ամենևին էլ տեսական չեն, այլ միանգամայն իրական սպառնալիք են: «Մինչև վերջերս ռուսամետ ուժերը շատ թույլ էին ներկայացված Ադրբեջանի քաղաքական ասպարեզում, և գերադասում էին քողարկված գործել: Սակայն ուկրաինական իրադարձություններից հետո այդ ուժերը սկսեցին բացահայտ հավանություն տալ Ղրիմի բռնակցմանը, միաժամանակ զգալիորեն ակտիվացավ ռուսամետ քարոզչությունը ԶԼՄ-ներում ու սոցցանցերում: Ադրբեջանի կոմկուսը միանգամից նամակ ուղարկեց Վլադիմիր Պուտինին՝ միանշանակ աջակցություն հայտնելով Ռուսաստանի գործողություններին Ղրիմում և շեշտելով Խորհրդային Միության նման միավորման ստեղծման անհրաժեշտությունը հետխորհրդային տարածքում Արևմուտքի ճնշմանը հաջողությամբ դիմակայելու նպատակով: Նամակում նաև ցանկություն է արտահայտվում, որպեսզի Ադրբեջանն անդամակցի Մաքսային միությանը: Ըստ ադրբեջանցի կոմունիստների, Մաքսային միության ստեղծումը կարող է առաջին քայլը դառնալ հետխորհրդային հանրապետությունների ճանապարհին: Ճիշտ է, որոշ փորձագետներ խորհուրդ են տալիս առաձնակի կարևորություն չտալ տեղացի կոմունիստների նման հայտարարություններին, պատճառաբանելով իրենց դիրքորոշումը նրանով, որ այսպես կոչված Ադրբեջանի կոմկուսն իրականում մի բուռ մարդկանցից է կազմված, որոնք հեղինակություն չունեն ադրբեջանական հանրության շրջանում: Չժխտելով այս փաստը՝ այնուամենայնիվ պետք չէ նսեմացնել վտանգն Ադրբեջանի ազգային անվտանգության համար: Չէ որ, որքան էլ փոքրաթիվ լինեն տեղացի կոմունիստները, նրանք այնուամենայնիվ կարող են «ալիբի» ապահովել ռուսական կողմի համար երկիր ներխուժելու դեպքում: Պետք չէ մոռանալ, որ տառացիորեն մինչև վերջին պահը ոչ ոք լուրջ չէր ընկալում նաև Ղրիմում գործող «Ռուսական միասնություն» շարժումը, որը Ղրիմի խորհրդարանի վերջին ընտրություններում ստացել էր ձայների ընդամենը 4 տոկոսը: Սակայն հենց այդ շարժումն առանցքային դեր կատարեց ռուսական ներխուժման գործում, իսկ նրա առաջնորդ Սերգեյ Ակսյոնովը ստացավ Ղրիմի վարչապետի պաշտոնը»,-ասվում է հոդվածում: Հեղինակը հիշեցնում է, որ 1920 թվականի գարնանն ադրբեջանցի կոմունիստները նույնպես մի քանի տասնյակի էին հասնում և լուրջ հեղինակություն չունեին բնակչության շրջանում: Սակայն հենց նրանց «հրավերին» պատասխանեց ռուսական բանակը՝ հատելով ադրբեջանական սահմանն ու 70 տարով գրավերով երկիրը: Ի դեպ, պետք է խոստովանել, որ ամենևին էլ տեղացի կոմունիստները չեն Ադրբեջանում ռուսական «հինգերորդ շարասյան» գլխավոր ուժը: «Ազգային անվտանգության տեսակետից Ադրբեջանում հատկապես տագնապալի է այն փաստը, որ որոշ նախկին ու ներկա պաշտոնյաներ միաժամանակ օլիգարխներ են, որոնց բիզնեսի զգալի մասը գտնվում է Ռուսաստանի տարածքում: Դա նրանց խոցելի է դարձնում Կրեմլի ճնշման առջև, որն անհրաժեշտության դեպքում կարող է հեշտությամբ օգտագործել նրանց իր շահերից ելնելով: Բաքվի համար տագնապալի ազդանշան էր, օրինակ, Ադրբեջանի նախկին առաջին փոխվարչապետ Աբբաս Աբասովի հայտարարությունը, նա այժմ Մոսկվայում է ապրում: Անվերապահորեն սատարելով Պուտինի գործողություններին Ղրիմում՝ Աբասովը միաժամանակ կոչ արեց ադրբեջանական ԶԼՄ-ներին հրաժարվել Կրեմլի քննադատության քաղաքականությունից: Աբասովի հայտարարությունը պետք է ընկալել որպես ռուսաստանաբնակ ադրբեջանցի օլիգարխների ընդհանուր դիրքորոշում: Զարմանալի չէ, որ նույն ոճով արտահայտվեցին նաև Ռուսաստանի Ադրբեջանցիների ազգային մշակութային ինքնավարության նախագահ Սոյուն Սադիկովն ու այլոք: Իսկ Ադրբեջանի ներսում Ղրիմի բնռակցմանը Ռուսաստանին անուղղակիորեն հավանություն տվեցին Կրոնական գործերի պետական կոմիտեի նախկին նախագահ Ռաֆիկ Ալիևը, քաղաքագետ Ռասիմ Ալիևը և որոշ պատգամավորներ: Առնվազն, այդպիսի եզրակացություն կարելի է անել նրանց հարցազրույցներից ու նյութերից, որտեղ նրանք Ռուսաստանին բացահայտ ագրեսոր չեն անվանում և փորձում են մեղմել սուր անկյունները: Այդ կապակցությամբ ուշագրավ է այն փաստը, որ ազդեցիկ օլիգարխների լոբբիստական ջանքերը երկրի ներսում ու դրսում վերջին տարիներին ռուսական ԶԼՄ-ները, բիզնես կառույցները, կրթամշակութային հաստատությունները սկսել են ակտիվորեն գործել Ադրբեջանում»,-նշել է հեղինակը: Ըստ պորտալի, Մոսկվան ազդեցության բավականին լուրջ լծակներ ունի, որոնց օգնությամբ նա կարող է ապակայունացնել վիճակն Ադրբեջանում, որպեսզի առիթ ստանա իր նվաճողական ծրագրերն իրագործելու: «Առաջին հերթին խոսքը ղարաբաղյան հակամարտության մասին է, որը մնում է Մոսկվայի ճնշման ամենալուրջ լծակն Ադրբեջանի վրա: Այս հակամարտության չկարգավորված լինելը իրական է դարձնում ռազմական գործողությունների վերսկսումը ցանկացած պահի, ինչը կարող է հարմար առիթ հանդիսանալ ռուսական ներխուժման համար: Պետք չէ մոռանալ, որ անջատողականության օջախների բորբոքումն այս կամ այն երկրում նրա ներքին գործերին հետագայում միջամտելու հեռանկարով Կրեմլի որդեգրած մարտավարությունն է ԽՍՀՄ փլուզումից ի վեր: Այս առումով Մոսկվան կարող է հրահրել անջատողական տրամդրություններ Ադրբեջանի հյուսիսային ու հարավային շրջաններում, որոնք բնակեցված են հիմնականում դաղստանալեզու ժողովրդներով՝ լեզգիներով, ավարներով, ծախուրներով, ինչպես նաև թալիշներով: Առավել ևս, որ ռուսական կողմը պարբերաբար քաղաքական ու տեղեկատվական դիվերսիաների է դիմում այս ուղղությամբ: Բավական է նշել, որ լեզգիների, ավարների ու թալիշների անջատողական առաջնորդների որջը հենց Մոսկվայում է գտնվում: Բացի այդ, չի կարելի բացառել, որ կրիտիկական իրավիճակում Ադրբեջանում գոյություն ունեցող «հինգերորդ շարասյունը» կարող է շատ արագ համալրեր իր շարքերը ՌԴ-ում աշխատող ադրբեջանցիների ու նրանց ընտանիքների հաշվին: Իսկ նրանց քանակը Ռուսաստանում տարբեր գնահատականներով հասնում է 600 հազարից մինչև 2 միլիոնի: Իրավիճակը բարդացնում է այն հանգամանքը, որ Ադրբեջանը, ինչպես և մյուս հետխորհրդային երկրները, չի կարող սեփական ուժերով չեզոքացնել բոլոր այդ սպառնալիքները, որոնք բխում են Ռուսաստանից: Ուստի այդ երկրների ապագան լիովին կախված է Արևմուտքի ու Ռուսաստանի միջև դիմակայության ելքից և Կրեմլի նոր կայսերական նկրտումներին հակահարված տալու արևմտյան երկրների վճռականությունից, ասվում է Vesti.az-ի հոդվածում: Հղումներ թեմայով. Ուշագրավ Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար
Շատերը զրկվել են տանիքից և գիշերում են փողոցում | Բագրատ սրբազան․ Մեծ հանդիպում ենք նախատեսում բոլոր քաղուժերի հետ` քննարկվելու է վարչապետի թեկնածուի հարցը Նա նշել է, որ Բաքվի բանտերում պահվող Արցախի ղեկավարության հետ աղ ու հաց են կիսել, բայց հարցը չեն բարձրաձայնում Փաշինյանը՝ Ադրբեջանի հետ խաղաղ գործընթացի մասին. Տիեզերք թռիչքները ևս անիրական էին թվում Նա ընդգծել է, որ ՀՀ ռազմավարությունն ուղղված է տարածաշրջանի հարևանների հետ տնտեսական ինտեգրման խորացմանը Ուրուգվայի Ներկայացուցիչների պալատը միաձայն ընդունել է ապրիլի 24-ը Հայոց ցեղասպանության հիշատակի օր հռչակող օրինագիծը Նախաձեռնությունը Սենատի կողմից հավանության էր արժանացել մայիսի 7-ին ՀՀ–ն և Սլովակիան պայմանավորվել են ռազմատեխնիկական գործակցության շուրջ Կարեն Բրուտյանի գլխավորած պատվիրակությունը Բրատիսլավայում է |