11.11.14 - Հայաստանյաց Առաքելական Ս. Եկեղեցու Եպիսկոպոսաց ժողովի բացումը

2015-ի ապրիլի 23-ին Հայոց ցեղասպանության նահատակներին կսրբադասեն

14 նոյեմբերի 2014 - 10:46 AMT

PanARMENIAN.Net - Նոյեմբերի 11-ին մեկնարկած Հայ առաքելական եկեղեցու Եպիսկոպոսաց հերթական ժողովը նախօրեին՝ նոյեմբերի 13-ին, ավարտել է իր աշխատանքը: Նոյեմբերի 11-12-ի նիստերը նվիրվել են սրբադասման կարգի և Հայոց ցեղասպանության նահատակների սրբադասմանն առնչվող հարցերին:

Եպիսկոպոսաց ժողովը հաստատել է Հայ եկեղեցու սրբադասման ծիսակարգը և արարողակարգը:

Հայոց ցեղասպանության նահատակների սրբադասման արարողությունը որոշվել է կատարել 2015-ի ապրիլի 23-ին՝ Մայր աթոռում: Որպես ամենամյա եկեղեցական հիշատակության տոնացուցային օր սահմանվել է ապրիլի 24-ը, տեղեկացնում են Մայր աթոռի մամուլի դիվանից:

Սրբադասման արարողակարգից և ծիսական կանոնակարգից բացի Եպիսկոպոսաց այս ժողովի օրակարգում էր Սուրբ մկրտության խորհրդի բարեկարգյալ ծիսակարգը:

Ժողովն ընդունել է Հայոց ցեղասպանության նահատակների ամենամյա հիշատակման ծիսական կանոնը, որը ներառում է շարականի կանոնը և ժամամուտը, ինչպես նաև ցեղասպանության նահատակ սրբերի վկայաբանությունը: Որոշվել է հիշյալ փաստաթղթերը վերջնական լրամշակումից հետո որդեգրել:

Սրբադասման հանձնախմբին հանձնարարական է տրվել նաև ձեռնամուխ լինել անհատական սրբադասման համար անհրաժեշտ ուսումնասիրություններին` նկատի ունենալով Կոմիտաս վարդապետին և այլ անհատներին: Նոյեմբերի 13-ի առաջին նիստին ժողովի մասնակիցներն աղոթել են Արցախի առաջնագծում ադրբեջանական զինված ուժերի կողմից ԼՂՀ ՌՕՈւ ուղղաթիռի խոցման հետևանքով զոհված երեք հայորդու համար և դատապարտել Ադրբեջանի սադրիչ գործողությունները:

Նոյեմբերի 12-ին ղարաբաղա-ադրբեջանական շփման գծի մոտակայքում ուսումնավարժական թռիչքի ժամանակ ադրբեջանական ԶՈւ-ն հրադադարի ռեժիմի խախտման արդյունքում խոցել է ԼՂՀ ՌՕՈւ ՄԻ-24 ուղղաթիռը:

Ամենայն Հայոց Կաթողիկոսը և Մեծի Տանն Կիլիկիո Կաթողիկոսը հանձնարարել են եպիսկոպոսներին եկեղեցիներում հոգեհանգստյան արարողություն կատարելզոհված օդաչուների համար: Հանձնարարվել է նաև պետական և միջազգային լիազոր բոլոր ատյաններում աշխատանքներ իրականացնել` կանխարգելելու Ադրբեջանի կողմից ԼՂ հակամարտության խաղաղ կարգավորման գործընթացը խաթարող սադրիչ և ռազմատենչ գործողությունները և չեզոքացնելու պատերազմի վերսկսման վտանգը:

Նոյեմբերի 13-ի երրորդ նիստին մասնակցել է ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցին նվիրված միջոցառումների աշխատանքները համակարգող Վիգեն Սարգսյանը: Նա հանգամանալից ներկայացրել է Հայոց ցեղասպանության 100-րդ տարելիցի առթիվ 2015-ին նախատեսվող պետական ծրագրերը` անդրադառնալով հայ եկեղեցու հետ Հայաստանում և Սփյուռքում համատեղ իրականացվելիք միջոցառումներին: Տեղեկացվել է նաև նախապատրաստական աշխատանքների ընթացքի մասին:

Եպիսկոպոսաց ժողովը հայտարարություն է տարածել, որում կոչ է անում միջազգային հանրությանը` «վճռականորեն շարունակելու Օսմանյան կայսրության կողմից հայ ժողովրդի դեմ իրագործված` 20-րդ դարի առաջին ցեղասպանության ճանաչման և դատապարտման գործընթացը», ինչպես նաև Թուրքիայի Հանրապետությանը` ճանաչելու հայ ժողովրդի դեմ իրագործված Ցեղասպանությունը և վերահաստատելու հայ ժողովրդի արդար իրավունքները:

Եպիսկոպոսաց հաջորդ ժողովը կգումարվի 2016-ին:

Կարդացեք նաև՝ Էջմիածնում մեկնարկել է Եպիսկոպոսաց ժողովը. Նախագահը հանդիպել է Գարեգին Բ-ին և Արամ Ա-ին

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: