Եվրասիական զարգացման բանկը նվազեցրել է ՀՀ տնտեսական աճի կանխատեսումը

PanARMENIAN.Net - Եվրասիական զարգացման բանկը (ԵԶԲ) նվազեցրել է ՀՀ տնտեսական աճի կանխատեսումը տարեվերջի համար 4 տոկոսից մինչև 3,3 տոկոս: Այդ մասին ասվում է «ԱՊՀ մակրոմոնիտորինգ»-ի դեկտեմբերյան զեկույցում, որը հրապարակել է ԵԶԲ վերլուծական վարչությունը:

Ըստ ԵԶԲ վերլուծության, մինչև տարեվերջ նվազող ներքին պահանջարկի (այդ թվում դրամի արժեզրկման) բացասական ազդեցության, ինչպես նաև արտաքին պահանջարկի, մասնավորապես ՌԴ-ում տնտեսության աճի դանդաղեցման և Եվրոպայում թույլ աճի պայմաններում, Հայաստանի ՀՆԱ աճը սահմանափակ կլինի: Փաստաթղթում ասվում է, որ 2014-ի հոկտեմբերին տնտեսական ակտիվության ցուցանիշը կրկին նվազեց, աճը տարեկան կտրվածքով կազմեց 3,7 տոկոս և 4,2 տոկոս 9 ամսում, հայտնում է ԱՌԿԱ գործակալությունը:

«Հայաստանի տնտեսությունը ավելի զգայուն գտնվեց Ռուսաստանում տնտեսության աճի դանդաղեցման և բարձր աշխարհաքաղաքական անորոշության հանդեպ, որն արտահայտվեց ներդրումային ակտիվության նվազման, դրամական փոխանցումների կրճատման ու թուլացող արտահանման տեսքով»,-նշել են վերլուծաբանները:

Ռուսաստանում տնտեսական խնդիրներն ու ռուսական ռուբլու անկումը բացասաբար են անդրադառնում նաև Հայաստանի տնտեսության վրա, առաջին հերթին Ռուսաստանից Հայաստան դրամական փոխանցումների ծավալի վրա: Ռուսաստանից դրամական փոխանցումների նվազման միտումը գրանցվում է արդեն հինգերորդ ամիսն անընդմեջ։ 2014-ի հունվար-հոկտեմբերին Ռուսաստանից փոխանցվել է 1,240 մլրդ դոլար 2013-ի 1,298 մլրդ դոլարի դիմաց, անկումը կազմել է 4,5 տոկոս: Ընդհանուր առմամբ 10 ամսում երկիր է փոխանցվել 1,484 մլրդ դոլար 2013-ի նույն ժամանակահատվածի 1,512 մլրդ դոլարի դիմաց՝ անկումը 1,9 տոկոս:

Ըստ ՀՀ պետբյուջեի 2014-ին նախատեսվում էր ապահովել ՀՆԱ 5,2 տոկոս աճ, ավելի ուշ կանխատեսումը նվազեցվեց մինչև 3,6-4,2 տոկոս: 2015-ի բյուջեով նախատեսվում է 4,1 տոկոս աճ: