Թուրքիան մասնակիորեն փակել է Սիրիայի հետ սահմանը

12 մարտի 2015 - 12:08 AMT

PanARMENIAN.Net - Թուրքիայի իշխանությունները երկու հսկիչ անցակետ են փակել Սիրիայի հետ սահմանին: Այդ որոշումը բացատրվում է բախումների ակտիվացմամբ Հալեպի շրջանում: Հաթայ գավառում գտնվող անցակետերը փակ են մարտի 9-ից, հայտնում է Ռոսբալտը Reuters-ի վրա հղումով:

Ավելի վաղ հայտնի դարձավ, որ ԻՊ գրոհայինները լայնածավալ հարձակում են սկսել Սիրիայում, որի թիրախն է Ռաս ալ Այն քաղաքը Թուրքիայի հետ սահմանին: Գրոհայինները մարտեր են վարում քուրդ աշխարհազորայինների դեմ այդ քաղաքի մատույցներում:

Ավելի վաղ Թուրքիայի ԱԳ նախարար Մևլութ Չավուշօղլուն հայտարարեց, որ ահաբեկչությունից տառապող Թուրքիան այսօր առաջատար երկրներից է, որոնք պաշտպանում են միջազգային հանրությանն ահաբեկչության դեմ պայքարում:

Ըստ նրա, Թուրքիան, մի կողմից, անմիջական մասնակցություն ունի Ահաբեկչության դեմ պայքարի գլոբալ ֆորումին և FATF նախագծին, որն ուղղված է ԻՊ ֆինանսավորման կասեցմանը: Մյուս կողմից, տեղեկություններ է փոխանակում ԻՊ և արտերկրի ահաբեկիչների վերաբերյալ: «Ահաբեկչության դեմ հաջող պայքարի համար միջազգային հանրությունը պետք է միանա դրան և գործի միասնական ռազմավարության շրջանակում, վերացնելու համար վտանգը»,-ասել է նախարարը:

Անդրադառնալով ԻՊ հարցին, Չավուշօղլուն նշել է, որ Թուրքիան, պաշտպանելով ազգային շահերը, պայքարում է ծայրահեղականների դեմ Սիրիայում: «Պետք է համատեղ պայքար մղվի ծայրահեղականների դեմ»,-ասել է Չավուշօղլուն:

«Ինչպես նշվել է ավելի վաղ, ծայրահեղականությունը ոչ թե պատճառն է, այլ հետևանքը: ԻՊ առաջացման հիմնական մեղավորը Ասադի ռեժիմն է, ուստի, ԻՊ դեմ պայքարելով, չպետք է մոռանալ Ասադի ռեժիմի մասին»,-ասել է Չավուշօղլուն:

Փետրվարի լույս 23-ի գիշերը թուրքական զինվորական ստորաբաժանումները Կոբանի քաղաքի մոտակայքում հատեցին թուրք–սիրիական սահմանը և ներխուժել Սիրիայի տարածք։ Գրավյալ հատվածում է գտնվում Օսմանյան կայսրության հիմնադիր Օսման I-ի պապ` Սուլեյման շահի դամբարանը, որը հսկում էին թուրքական պահակախմբի 39 անդամները:

Գործողությանը մասնակցել է 700 թուրք զինվոր, 100 միավոր ռազմական տեխնիկա, ներառյալ 39 տանկ: Տարհանման ժամանակ պատվո պահակախմբի մեկ անդամը մահացել է:

Լոնդոնում լույս տեսնող «Ա Շարք ալ Ասուաթ» թերթը հայտնեց, որ Թուրքիան զգուշացրել է ԻՊ հրամանատարությանը գործողության անցկացման մասին փետրվարի 22-ին: Թերթը հղում է կատարում Անկարայի կառավարական շրջանակում անհայտ աղբյուրի վրա, որն ասել է, թե ԻՊ-ն իրազեկվել է ոչ պաշտոնական կանալներով: Թուրքիայի ԱԳՆ մամուլի քարտուղար Թանջու Բիլգիչը հրաժարվել է մեկնաբանել հրապարակումը:

Սիրիայի կառավարությունն իր հերթին պատասխանեց թուրք զինվորականների ներխուժմանը Սիրիա: Սիրիայի ԱԳ նախարար Ֆեյսալ Մեկդադը հայտարարեց, որ երկիրն իրեն իրավունք է վերապահում պատասխանել ռազմական ներխուժմանը: Նա կոչ է արել համաշխարհային հանրությանն ուշադրություն դարձնել Սիրիայի ինքնիշխանության խախտման փաստին թուրք զինվորականների կողմից: Մեկդադը հայտնել է, որ թուրք զինվորականները պետք է պատասխան տան դրա համար:

Շահ Սուլեյմանի դամբարանը գտնվում էր Սիրիայի տարածքում, որն ըստ 1921թ. պայմանագրի, թուրքական տարածք է համարվում, այսինքն՝ անկլավ:

Photo: endtimeheadlines.wordpress.com

Հղումներ թեմայով.

Росбалт: Турция закрыла часть границы с Сирией из-за продвижения сил "Исламского государства"