Գյումրիի գործ. Ապացույցների հիմնական մասը հայկական կողմում է20 մարտի 2015 - 17:52 AMT PanARMENIAN.Net - Հայ իրավապահների անգործության շնորհիվ ունենք մի իրավիճակ, որ երկու կողմի՝ հայկական և ռուսական, մեծագույն ցանկության դեպքում էլ Ավետիսյանների սպանության գործի բազմակողմանի քննությունը հարցականի տակ է դրված, այսօր՝ մարտի 20-ին, լրագրողների հետ հանդիպման ժամանակ ասել է Ավետիսյանների իրավահաջորդների ներկայացուցիչ, փաստաբան Լուսինե Սահակյանը: Նրա խոսքով, այս գործում ամենակարևոր հարցերից մեկն այն է, թե ինչպես է Պերմյակովը հայտնվել ռուսական կողմում, ինչի հետևանքով էլ առաջացել է իրավաբանորեն ոչ ճիշտ իրավիճակ, հարուցվել է քրեական երկու գործ: «Նման վիճակ ստեղծվել է հայ իրավապահների անգործության շնորհիվ: Երկու կողմն է փորձում է լուծումներ գտնել, որպեսզի հնարավոր լինի օգտագործել մեկը մյուսի ապացույցները բազմակողմանի քննության համար: Ապացույցների հիմնական մասը գտնվում է հայկական կողմում, բայց մի մասն էլ ռուսական կողմի մոտ է»,- ասել փաստաբանը: Ըստ նրա, չի կարող գտնվել որևէ իրավաբան, ով կարող է ասել, թե որն է այս գործի իրավական լուծումը. «Այս գործում իրավաբանական լուծում չի կարող լինել, թեև կողմերը փորձում են ստեղծված իրավիճակում համատեղ լուծումներ գտնել»: Ավետիսյանների գործով դատաձգաբանական եզրակացությունների արդյունքների համաձայն, դեպքի վայրում հայտնաբերված 28 պարկուճն արձակվել է նույն ինքնաձիգից, որն ամարկցված է եղել ռուսական ռազմաբազայի զինծառայող Վալերի Պերմյակովին և որը հայտնաբերվել է դեպքի վայրում, փորձաքննության մասին մանրամասներ է ներկայացրել Ավետիսյանների իրավահաջորդների ներկայացուցիչ, Փաստաբանների պալատի անդամ Երվանդ Վարոսյանը: Գործով նշանակված դատակենսաբանական փորձաքննության եզրակացության համաձայն, Պերմյակովի քրտինքը և դեպքի վայրում հայտնաբերված հագուստի, կոշիկների վրայի քրտինքի հետքերը խմբային նույն պատկանելիությանն են: Սակայն 100 տոկոսով հստակություն կլինի, երբ լինեն դատագենետիկական փորձաքննության արդյունքները: Իրավահաջորդների ներկայացուցիչ, Փաստաբանների պալատի անդամ Երեմ Սարգսյանն ասել է, որ դատակենսաբանական փորձաքննության են ենթարկվել դեպքի վայրում հայտնաբերված մի շարք օբյեկտներ, նաև զինվորական հագուստի, գլխարկի վրա հայտնաբերված մազերը: Պարզվել է, որ բոլորը թողնված են կոնկրետ այն խմբի արյուն ունեցող անձի կողմից, որն ունի Պերմյակովը: Երեք իրի վրա հայտնաբերվել է թքի առկայություն, որը կրկին նույն խմբի արյուն ունեցող անձի կողմից է թողնված, որն ունի Պերմյակովը: Ե. Սարգսյանն ասել է, որ միայն բոլոր տվյալների համակցության ամբողջությամբ կարող են պարզել, թե իրականում Պերմյակովն է այնտեղ եղել, թե ոչ: Այս առումով նա կարևորել է նշանակված դատագենետիկական փորձաքննության արդյունքները, որոնք կլինեն մոտ ժամանակներում: «Ինչ ունենք այս պահին. նախ այն, որ բոլոր կրակոցներն արձակվել են նույն ինքնաձիգից, որն ամրակցված է եղել Պերմյակովին, որը հայտնաբերվել է դեպքի վայրում: Չունենք որևէ եզրակացություն, որը հերքի Պերմյակովի՝ այնտեղ գտվելը կամ որ մեկ ուրիշն է կրել նրա հագուստը: Իսկ մնացած հարցերի պատասխաններն ակնկալում ենք գենետիկական փորձաքննության եզրակացությունը ստանալուց հետո»,- ասել է Ե. Վարոսյանը: Ինչ վերաբերում է Պերմյակովի մոտ հայտնաբերված բջջային երեք հեռախոսին, Ե. Սարգսյանն ասել է, որ այս պահին այդ հեռախոսները գտնվում են ռուսական կողմի մոտ: «Իրականում շատ կարևոր է ինչպես այդ հեռախոսների, այնպես էլ Պերմյակովի՝ գտնվելու ժամանակ կրած հագուստի ճանաչումն իրավահաջորդների կողմից: Եթե իրականում դրանք ճանաչվեն իրավահաջորդների կողմից, հետևաբար, իրոք, դրանք տարվել է այդ տանից, ինչը կխոսի այն մասին, որ Պերմյակովը գտնվել է այդ տանը: Իսկ այն, որ հագուստներն ու բջջայինները ռուսական կողմի մոտ են, տրամաբանական է, քանի որ հենց նրանք են հայտնաբերել Պերմյակովին»,- ասել է Լ. Սահակյանը՝ հավելելով, որ այն պահից սկսած, երբ ինչ որ գործողություններից հետո դրանք հայտնվեն հայկական կողմում, կատարվի ճանաչում, այս գործը հնարավոր կլինի ավելի բազմակողմանի քննել: Հարցին, թե Պերմյակովի հոգեկան առողջության վերաբերյալ որևէ եզրակացությո՞ւն կա, Լուսինե Սահակյանը պատասխանել է, որ Հայաստանում իրականացվող քննությունը, այս վարույթի շրջանակներում դեռևս չի նշանակվել փորձաքննություն: Միաժամանակ հավելել է, որ տուժողների ներկայացուցիչների հետ քննարկում են նման միջնորդություն ներկայացնելու հարցը, սակայն դա ևս պետք է համապատասխան փուլում լինի: Արդյո՞ք խլացուցիչ օգտագործվել է, թե՞ ոչ. Ե. Վարոսյանն ասել է, որ դա կպարզվի հետքաբանական փորձաքննությամբ, որի արդյունքը դեռ չեն ստացել: Պերմյակովը չբերվեց դեպքի վայր՝ տեղազննության համար, հայկական կողմը չի՞ փորձելու որևէ միջնորդություն ներկայացնել, Լ. Սահակյանը պատասխանելով հարցին, ասել է. «Անպայման չէ, որ բոլոր քրեական գործերի դեպքում լինի դեպքի վայրի զննություն: Դա որոշվում է քննիչի կողմից գործի քննության ընթացքում՝ անհրաժեշտության դեպքում: Որոշ դեպքերում նույնիսկ սխալ է, որ անձը բերվում է դեպքի վայր. ցուցմունք է տալիս առանց դեպքի վայրն իմանալու, երբ տեսնում է ու արդեն որոշակի պատկերացում է կազմում, հետագայում շտկում է իր ցուցմունքը: Այսինքն դա կարող է նույնիսկ վնասել քրեական գործին»: Ինչ վերաբերում է քննության նկատմամբ եղած վստահությանը, Երվանդ Վարոսյանն ասաց, որ հայկական կողմից վարույթ իրականացնող մարմինն իրենց հետ համագործակցության եզրեր փորձում է գտնել, թույլ են տվել ներկա լինել բոլոր փորձաքննություններին: Հունվարի 12-ին Գյումրիում հայտնաբերվեցին Ավետիսյանների ընտանիքի 6 անդամի դիերը: Ընտանիքի մյուս երեխան՝ 6-ամսական Սերյոժա Ավետիսյանը, ծանր մարմնական վնասվածքներով տեղափոխվել էր հիվանդանոց, որտեղ վիրահատվեց։ Չնայած բժիշկների ջանքերին, երեխային փրկել չհաջողվեց, փոքրիկը մահացավ հունվարի 19-ին: Հայ-թուրքական սահմանը հատելու փորձի ժամանակ հայտնաբերված կասկածյալ Վալերի Պերմյակովին մեղադրանք առաջադրվեց, նա ընդունել է իր կատարած հանցանքը: Նրան տեղափոխեցին ռուսական ռազմակայան, ինչը բողոքի մեծ ալիք բարձրացրեց: Ավետիսյանների ընտանիքի սպանության մեջ կասկածվող Վալերի Պերմյակովին մեղադրանք է առաջադրվել ՌԴ ՔՕ 105-րդ հոդվածի 2-րդ (սպանություն) և 338-րդ հոդվածի 2-րդ մասի (դասալքություն) հատկանիշներով, որպես խափանման միջոց ընտրված է կալանքը: Միաժամանակ, որոշում է կայացվել Վալերի Պերմյակովին որպես մեղադրյալ ներգրավել ՀՀ ՔՕ 104-րդ հոդվածի 2-րդ մասի 1-ին կետով (այն է՝ երկու կամ ավելի անձանց սպանություն, ինչը պատժվում է 8-ից 15 տարի ժամկետով կամ ցմահ ազատազրկմամբ) հարուցված քրգործով: Իսկ հունվարի 19-ին Գյումրիի քաղաքապետարանը ՀՀ գլխավոր դատախազ Գևորգ Կոստանյանին ուղերձ էր հղել, որում, մասնավորապես, նշվում էր՝ ակնկալվում է Կոստանյանի միջնորդությունը, որպեսզի հանցագործության նախաքննությունը հանձնվի հայ իրավապահներին, որոնք կապահովեն գործի քննության արդարացիությունը և թափանցիկությունը, իսկ դատավարությունը տեղի ունենա Հայաստանի Հանրապետությունում: Ձեռնարկվել են քննչական, դատավարական և օպերատիվ-հետախուզական այլ միջոցառումներ: Վալերի Պերմյակովին քրեական գործով որպես մեղադրյալ ներգրավելու մասին որոշում է կայացվել: Մեղադրյալն ընդունել է առաջադրված մեղադրանքը: ՀՀ գլխավոր դատախազ Գևորգ Կոստանյանը, ղեկավարվելով ՀՀ և ՌԴ միջև ՀՀ տարածքում ռուսաստանյան ռազմական բազայի գտնվելու հետ կապված գործերով իրավասության և փոխադարձ իրավական օգնության հարցերի վերաբերյալ Համաձայնագրի 6-րդ հոդվածով, հունվարի 12-ին Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը ՀՀ իրավապահ մարմիններին փոխանցելու վերաբերյալ միջնորդությամբ դիմել է ՌԴ գլխավոր դատախազ Յու. Չայկային: ՀՀ գլխավոր դատախազության միջնորդությունն այժմ քննարկվում է ՌԴ գործընկերների կողմից: Միջնորդության շուրջ ստեղծված թյուրըմբռնումներից խուսափելու համար հրապարակվեց դրա վերաբերյալ ՀՀ գլխավոր դատախազության միջազգային-իրավական կապերի բաժնի կողմից ՌԴ գլխավոր դատախազություն ուղարկված հարցման պատասխանի լուսապատճենը: Հղումներ թեմայով. Ուշագրավ
«Ամեն բնակչի կողքին 15 ոստիկան է կանգնած, անձնագրով են ներս թողնում միայն Կիրանցի բնակիչներին»,–ասել է վարչական ղեկավարը Որոշ դեպքերում անձանց ազատությունից զրկելիս չեն ներկայացվում նրանց ազատությունից զրկելու հիմքերն ու պատճառները Պահանջն առնչվում է նրա հետ փոխկապակցված 7 անձի Վարդանյանն ասել է, որ գտնվում է մեկուսացման խցում Ամենաընթերցվողը բաժնում | Ակբա բանկ․ ՀՀ-ում առաջին անգամ թողարկվում են UnionPay International-ի քարտեր Ակբա բանկը քարտերը տրամադրում է ռեզիդենտ և ոչ ռեզիդենտ ֆիզիկական և իրավաբանական անձանց Վարչապետ․ ՀԱՊԿ-ն ուզում էր ՀՀ գալ ոչ թե որպես դաշնակից, այլ` խաղաղապահ Նա հավելել է, որ դա էր ՀԱՊԿ-ի հետ հայկական կողմի ամենամեծ խնդիրը Փաշինյան. Ցեղասպանության զոհերի ցուցակագրման օրակարգ իշխանության օրակարգում երբեք չի եղել Նա նշել է, որ այդ մասին ավելի վաղ էլ է հայտարարվել Զաքարյան․ Չեմ ճանաչում երկիր, որը թշնամաբար տրամադրված իր հարևանի հետ անվտանգության երաշխիք համարի սահմանին տնկած սյունը Նա նշել է, որ սա «բոլոր հարցերում խորը կախվածության մեջ գցելու թշնամական գործընթաց է» |