ԱԳ փոխնախարար. Բաքուն ՄԱԿ-ի 3 նպատակին դեմ է գործում

23 հոկտեմբերի 2015 - 12:29 AMT

PanARMENIAN.Net - Ադրբեջանը գործում է ՄԱԿ-ի երեք նպատակին դեմ՝ հարցի խաղաղ լուծում, ժողովուրդների իրավահավարսարություն և ինքնորոշման իրավունք: Այս մասին հոկտեմբերի 23-ին լրագրողներին ասել է ՀՀ արտաքին գործերի փոխնախարար Շավարշ ՔոչարյանըԵրևանումՄոսկվայի Միջազգային հարաբերությունների պետական ինստիտուտի շրջանավարտների 3-րդ միջազգային համաժողովի ընթացքում:

Քոչարյանը նշել է, որ Հայաստանը երբեք չի խուսափել ամենաբարձր մակարդակի հանդիպումներից: Ղարաբաղյան հակամարտության գործընթացում առաջընթաց անհնար է, քանի դեռ Ադրբեջանի դիրքորոշումն ապակառուցողական է և արդեն անցել է բոլոր չափերը, գրում է Panorama.am-ը:

«Քանի Ադրբեջանի ղեկավարությունը իր ժողովրդին դարձրել է պատանդ այս հարցում, քանի դեռ իր ռեժիմը պահպանելու համար ատելություն է սերմանում հարևան ժողովրդի նկատմամբ, պահպանում է ղարաբաղյան հակամարտությունը իր ռեժիմը պահելու համար, բանակացային գործընթացում առաջընթաց չի լինի: Բայց սա չի նշանակում, որ Մինսկի խմբի համանախագահության գործողություններն անիմաստ են: Չի բացառվում այն հեռանկարը, որ Բաքուն, վերջիվերջո, խելքը գլուխը կհավաքի»,-ասել է փոխարտգործնախարարը:

ԵԱՀԿ ղարաբաղյան կարգավորման ՄԽ համանախագահները Հայաստան կայցելեն հոկտեմբերի 26-ին,այցի ընթացքում միջնորդները կհանդիպեն ՀՀ նախագահ Սերժ Սարգսյանի և ԱԳ նախարար Էդվարդ Նալբանդյանի հետ: Նրանք կլինեն նաև Լեռնային Ղարաբաղում:

Ավելի վաղ ԵԱՀԿ ՄԽ ամերիկացի համանախագահ Ջեյմս Ուորլիքը հայտարարել էր, որ «ամենաբարձր մակարդակի հանձնառությունը վերահաստատելու անհրաժեշտություն է զգացվում` հակամարտության խաղաղ կարգավորման լուծում գտնելու համար»:

Ըստ նրա, լարվածության մակարդակը տարածաշրջանում բարձր է, և ԵԱՀԿ ՄԽ-ն զգուշացնում է կողմերին նոր սրացմանը միտված քայլերից ձեռնպահ մնալու անհրաժեշտության մասին:

«Համանախագահները կայցելեն տարածաշրջան ամսվա վերջում, հանդիպելու համար նախագահներին ու նախապատրաստելու հաջորդ գագաթնաժողովը: Մենք ակնկալում ենք, որ նրանց հանդիպումը կարող է նպաստել բանակցային գործընթացի առաջխաղացմանը և իր ավանդը կունենա անվտանգության ոլորտում իրավիճակի կայունացման մեջ»,-ասել է նա:

Ադրբեջանի ԱԳ նախարար Էլմար Մամեդյարովն, անդրադառնալով ՀՀ և Ադրբեջանի նախագահների հանդիպման հարցին, ասել էր. «Հայաստանի և Ադրբեջանի նախագահների հանդիպման ժամկետների և վայրի հարցում շտապել պետք չէ: Համանախագահների այցի ժամանակ այդ հարցը կքննարկվի: Երկու ճանապարհ կա. կամ նախագահները կընտրեն հանդիպման վայրը, կամ համանախագահները կժամանեն պատրաստի առաջարկով: Ամեն դեպքում մենք սպասում ենք համանախագահների այցին տարածաշրջան»:

Կարդացեք նաև՝ Բաբայան. ՄԽ միջնորդների հետ կքննարկվի դիտորդների ավելացումն ու տեսագրող սարքերի տեղադրումը

Հղումներ թեմայով.

Ադրբեջանը գործում է ՄԱԿ-ի երեք նպատակներին դեմ. Շավարշ Քոչարյան. Panorama.am