ՌԴ ԱԳՆ. Ռուսաստանի համար Ասադի պաշտոնավարման հարցը սկզբունքային չէ

PanARMENIAN.Net - Սիրիայի գործող նախագահ Բաշար Ասադի պաշտոնավարման հարցը Ռուսաստանի համար սկզբունքային չէ: Այդ մասին «Էխո Մոսկվի» ռադիոկայանի եթերում հայտարարել է ՌԴ ԱԳՆ ներկայացուցիչ Մարիա Զախարովան, հայտնում է ՌԻԱ Նովոստին:

«Ամենևին ոչ, մենք երբեք նման բան չենք ասել»,-հայտարարել է Զախարովան` պատասխանելով այն հարցին, թե արդյոք Ռուսաստանի համար սկզբունքային է այն հարցը, թե կշարունակի արդյոք Ասադը պաշտոնավարել Սիրիայում: Նա նշել է, որ Սիրիայի ժողովուրդը պետք է որոշի երկրի նախագահի ճակատագիրը: «Մենք չենք ասում, թե Ասադը պետք է մնա, կամ պետք է գնա»,-ասել է ԱԳՆ պաշտոնական ներկայացուցիչը:

2015-ի սեպտեմբերի 30-ից Ռուսաստանը Սիրիայի նախագահ Բաշար Ասադի խնդրանքով կետային ավիահարվածներ է հասցնում ԻՊ գրոհայինների դիրքերին Սիրիայում` Սու-25 կործանիչների, ինչպես նաև ՍՈւ-24Մ և ՍՈւ-34-ի կիրառմամբ: Ըստ ՌԴ ՊՆ, ռուսական ավիացիան արդեն զգալի վնաս է հասցրել գրոհայինների կառավարման համակարգին և նյութատեխնիկական ապահովմանը, ինչպես նաև մահապարտ ահաբեկիչների պատրաստման ենթակառուցվածքներին: Իրավապաշտպաններն իրենց հերթին պնդում են, որ իրականում ռուսական ավիացիան գրոհում է այն տարածքները, որոնք ԻՊ-ն չի վերահսկում: Մոսկվան մերժում է մեղադրանքները:

Ավելի վաղ նման հայտարարությամբ հանդես եկան նաև Իրանի իշխանությունները: Երկրի ԱԳ փոխնախարար Հոսեյն Ամիր Աբդոլլահիանն ասել է, որ Թեհրանը չի պնդում, թե Ասադը պետք է հավերժ պաշտոնավարի: