Թուրքիայում ահաբեկչության կազմակերպման մեղադրանքով ԻՊ 9 գրոհային է ձերբակալվել

4 նոյեմբերի 2015 - 13:50 AMT

PanARMENIAN.Net - Ստամբուլում ահաբեկչության կազմակերպման մեղադրանքով ահաբեկչական «Իսլամական պետություն» խմբավորման 9 գրոհային է ձերբակալվել Սիրիային սահմանակից Գազինատեպ գավառում, հայտնում է Sabah թերթը:

Ըստ տեղական իշխանությունների, գրոհայինները հարձակումներ էին նախապատրաստում Ստամբուլում քաղաքական կուսակցությունների գրասենյակների վրա` մահապարտ ահաբեկիչների օգնությամբ: Առգրավվել է մոտ 9 կգ տրոտիլ, 4 նռնակ, պայթուցիկ սարքեր, մահապարտի գոտի, չորս ատրճանակ և 2 հրացան, հայտնում է ՌԻԱ Նովոստին:

Հայտնվում է նաև, որ պատվիրատուները գտնվում են Սիրիայում:

Վերջին շրջանում ԻՊ գործունեությանը մասնակցության կասկածանքով արդեն մոտ 70 մարդ է ձերբակալվել Թուրքիայում:

Հոկտեմբերի 10-ին Անկարայում տեղի ունեցած 2 պայթյունի հետևանքով 97 մարդ է զոհվել, 246-ը` վիրավորվել: Պայթյունը տեղի է ունեցել երկաթուղային կայարանի շրջանում, որտեղ անցնում էր արհմիությունների կազմակերպած «Աշխատանք, խաղաղություն, ժողովրդավարություն» կարգախոսով հակապատերազմական հանրահավաքը:Ավելի ուշ հայտնի դարձավ, որ իշխանությունները պայթյունները որակել են որպես ահաբեկչություն:

2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Ծայրահեղականները հաջողության են հասել նաև իրաքյան տարածքներում՝ վերահսկողություն սահմանելով երկրի արևմուտքում մի քանի քաղաքների վրա: Հուլիսի վերջում նրանք հայտարարեցին Իրաքի ու Սիրիայի տարածքում խալիֆայության ստեղծման մասին:

Հղումներ թեմայով.

Reuters. Turkey arrests nine alleged Islamic State members preparing attack

Ria.ru. Девять боевиков ИГ, готовивших теракты в Стамбуле, арестованы в Турции