Սպորտային մեկնաբան. Ձմռանը Յուրա Մովսիսյանը և Արազ Օզբիլիսը կհեռանան «Սպարտակից»

PanARMENIAN.Net - Յուրա Մովսիսյանն ու Արազ Օզբիլիսը, հավանաբար, չեն շարունակի խաղալ ռուսաստանյան «Սպարտակի» կազմում: Նման հայտարարություն է արել «Մատչ ՏՎ»-ի մեկնաբան Նոբել Առուստամյանը` անդրադառնալով ձմեռային տրանսֆերտային «պատուհանին»:

«Ձմռանը «Սպարտակի» կազմում լուրջ փոփոխություններ են սպասվում: Հավանաբար, թիմից կհեռանան Կիլիլ Կոմբարովը, Յուրա Մովսիսյանը, Արազ Օզբիլիսը և Սերդար Տասկին: Այն հավանականությունը, որ «Սպարտակը» լրջորեն կթարմացնի կազմը, 3-4 դիրքով, գրեթե 100-տոկոսանոց է»,-ասել Առուստամյանը Eurosport.ru-ի փոխանցմամբ:

Transfermarkt-ի տվյալները վկայում են, որ վերոնշյալ 4 ֆուտբոլիստի համար «Սպարտակը« կարող է մոտ 19 մլն եվրո ստանալ:

2014-ին Յուրա Մովսիսյանի տրանսֆերային արժեքը կազմում էր մոտ $7,9 մլն: Մոսկովյան ակումբի հետ 28-ամյա ֆուտբոլիստի պայմանագրի ժամկետը սպառվում է 2019-ի ամռանը:

2015-ի սեպտեմբերին ճանաչված գործակալ Ռոման Օրեշչուկը հայտնել էր, որ Մովսիսյանը ձմռանը կարող է փոխել թիմը: Նրա խոսքով՝հայ հարձակվողի տեղափոխության շուրջ հետաքրքրված է անգլիական ակումբ:

Օզբիլիսը տեղափոխվել է «Սպարտակ» 2013-ին Կրասնոդարի «Կուբանից»:

2015-ի օգոտոսին հայտնի դարձավ, որ հայազգի 25-ամյա ֆուտբոլիստը, ով «գնահատվում է» €3.5 միլիոն, մերժել է թուրքական «Բուրսասպոր» ֆուտբոլային ակումբի հրավերը: Թուրքական ակումբի ղեկավարությունը տրանսֆերի պաշտոնական առաջարկ է արել Օզբիլիսին: Ասվում էր, որ նրան պայմանագիր է առաջարկվել մինչև 2018 թ.: Ավելի վաղ ՏԱՍՍ-ը հայտնել էր, որ «Սպարտակը» մի քանի առաջարկ ունի Օզբիլիսի հնարավոր տրանսֆերի վերաբերյալ, և որ ֆուտբոլիստը կարող է հեռանալ «Սպարտակից» ընթացիկ «տրանսֆերային պատուհանի» ժամանակ: Հաղորդվում էր, որ իսպանական «Ռայո Վալյեկանոն» ցանկանում է ձեռք բերել ֆուտբոլիստին ու նրա մեկ տարվա վարձակալության համար առաջարկել է €500.000, սակայն մոսկովյան ակումբը պահանջել էր € 1 մլն: