Թուրքիայում ձերբակալվել է Ջիզրեի քուրդ քաղաքապետը. Պատճառներն անհայտ են

PanARMENIAN.Net - Թուրքիայի ոստիկանությունը ձերբակալել է քրդաբնակ Շըրնաք գավառի Ջիզրե քաղաքի ազգությամբ քուրդ քաղաքապետ Լեյլա Իմրեթին:

Ինչպես հայտնել է DIHA քրդական գործակալությունը, քաղաքապետի լիազորությունները կասեցվել էին մի քանի օր առաջ, իսկ հունվարի 21-ին նրան ձերբակալել են և բերման ենթարկել ոստիկանություն: Ձերբակալության պատճառները չեն հրապարակվում:

Քրդաբնակ Ջիզրեում պարետային ժամ է գործում, բոլոր խախտողները կարող են գնդակահարվել:

Ավելի վաղ Amnesty International իրավապաշտպան կազմակերպությունը զեկույց էր հրապարակել, որտեղ ասվում է, որ Թուրքիայի կառավարության գործողությունները երկրի քրդաբնակ շրջաններում անմիջական «սպառնալիք են մոտ 200 հազար մարդու կյանքին և կարող են դիտարկվել որպես հավաքական պատիժ», որի կիրառումն արգելված է Ժնևի 1949թ. օգոստոսի 12-ի կոնվենցիայով:

Amnesty International-ը հայտնել է նաև թուրքական ոստիկանության բազմաթիվ ռազմական գործողությունների մասին բնակելի թաղամասերում` «ծանր զինտեխնիկայի և դիպուկահար զենքի կիրառմամբ»: Ըստ իրավապաշտպանների, հաճախ ուժայիններին զոհ են գնում «կանայք ու երեխաները, որոնք հազիվ թե բախումների մասնակիցներ լինեն»: Ըդնհանուր առմամբ, ըստ իրավապաշտպանների, ոստիկանների և զինվորականնեի այդ դաժանությունը «մշտական սպառնալիք է սովորական մարդկանց կյանքին, որնք վտանգավոր չեն ոչ կառավարության, ոչ շրջապատի համար»: