Սիրիայի բանակը Հալեպի հյուսիսում փակել է ահաբեկիչներին Թուրքիայի հետ կապող գլխավոր ուղիները

3 փետրվարի 2016 - 10:27 AMT

PanARMENIAN.Net - Սիրիայի բանակը աշխարհազորայինների աջակցությամբ մեկուսացրել է գլխավոր ուղիները Հալեպի հյուսիսում, որոնք ահաբեկիչներին կապում էին Թուրքիայի հետ: Այդ մասին ՌԻԱ Նովոստիին է հայտնել աղբյուրն աշխարհազորում:

«Բանակն ու մեր մարտիկները փակել են Մաեր-Անդան և Ազազ-Հալեպ մայրուղիները: Այդպիսով, գրոհայինները զրկվել են Թուրքիայից ստացվող աջակցությունից և զինամատակարարումներից»,-ասել է գործակալության զրուցակիցը:

Ըստ սիրիացի զինվորականների, հարձակումը շարունկավում է Հալեպ քաղաքից դեպի հյուսիս` թուրքական սահմանի ուղղությամբ: Մարտերն ընթանում են գրեթե 3 տարի պաշարված Նուբել և Ազ Զահրա քաղաքների համար: Փետրվարի 2-ին այդ ուղղությամբ երկու բնակավայր է ազատագրվել: Սիրիական հրետանու կրակի տակ է Ռեթյան քաղաքը, որը ահաբեկիչների խոշոր հենակետերից է:

ՌԴ օդուժը ավիահարվածներ է հասցնում գրոհայինների կուտակումներին, զինանոցներին, հրամանատարական կետերին և հրետանային դիրքերին: Ըստ սիրիացի զինվորականների, ահաբեկիչները խմբերով հեռանում են բնակավայրերից:

Սիրիական բանակը հունվարի 25-ին Դարաա նահանգում զինյալներից ազատագրել է ռազմավարական նշանակություն ունեցող Շեյխ-Միսքին քաղաքը: Նույն օրը Սիրիայի կառավարական զորքերը հսկողություն են հաստատել Լաթաքիայի Ար Ռաբիա քաղաքում: Գրոհին մասնակցել են նաև ռուս սպաներ, ռուսական օդուժի աջակցությամբ: Դա Բաշար Ասադին սատարող ուժերի համար ելք է բացել մինչև Թուրքիայի սահման:

Ավելի վաղ հայտնի դարձավ, որ սիրիական բանակն ազատագրել է Լաթաքիայի շրջանի մի քանի գյուղ, այդ թվում նաև հայաբնակ Ղնեմիե գյուղը, որի բնակիչները հեռացել են 4 տարի առաջ՝ զինյալ ահաբեկչական խմբավորումների ներխուժելու պատճառով:

Սիրիայի բանակը հունվարի 12-ին իր հսկողության տակ է առել Լաթաքիայի մոտ գտնվող Սալմա գյուղական ավանը:

Հղումներ թեմայով.

Ria.ru. Армия Сирии отрезала основные пути снабжения боевиков на севере Алеппо