Թուրքական բանակը ներխուժել է Հյուսիսային Իրաք

PanARMENIAN.Net - Թուրքական բանակը ներխուժել է սահմանակից Հյուսիսային Իրաք, որտեղ պատրաստություն է տեսնում քրդական գրոհայինների դեմ ուղղված լայնածավալ ռազմական գործողության համար, երեքշաբթի օրը հայտնել է Իրաքի ինտերնետ-կայքերից մեկը: «Թուրքական բանակը ներխուժել է Հյուսիսային Իրաքի Հաֆտանին, Սինեխտ եւ Պիրբիլա շրջանները, որտեղ տեղակայված են զրահատանկային տեխնիկան, «կոմանդոս» հատուկ նշանակության ստորաբաժանումները»,- ասվում է Իրաքի ԶԼՄ-ների հաղորդագրություններում, որը դեռւս թուրքական գլխավոր շտաբը չի մեկնաբանել, հայտնում է ՌԻԱ «Նովոստին»:



Թուրքական ԶԼՄ-ները, իրենց հերթին, ավելի վաղ հայտնել էին Իրաքի հետ սահմանին 20-հազարանոց զորամիավորման տեղակայման մասին: «Թուրքական զինված ուժերի ստորաբաժանումները Իրաքի հետ սահմանի երկայնքով անվտանգության գոտիներ են ստեղծել, որպեսզի թույլ չտան ՔԱԿ ահաբեկիչների մուտքը երկիր»,- գտնում է CNN-Turk-ը` հղում կատարելով ռազմական աղբյուրներին:



Այսպես կոչված Անկախ Քրդստան ստեղծել ձգտող ՔԱԿ-ի եւ Թուրքիայի տարիներ ձգվող հակամարտությունը դարձել է 37 հազար մարդկանց մահվան պատճառ: Թուրքական իշխանությունները հրաժարվում են երկխոսություն սկսել անջատողակնների հետ եւ մտադիր են ուժով վերջ տալ ՔԱԿ-ին: