ԶԼՄ-ներ. ԵՄ-ն էլեկտրոնային գրանցման նոր կանոններ կսահմանի միության տարածք ժամանողների համար

PanARMENIAN.Net - ԵՄ-ն էլեկտրոնային գրանցման նոր կանոններ է պատրաստում երրորդ երկրների այն քաղաքացիների համար, որոնք իրավունք ունեն մուտք գործել Եվրամիության տարածք առանց մուտիք վիզայի, հայտնում է Korrespondent.net-ը:

Եվրահանձնաժողովն առաջարկություններ է պատրաստում, որոնք նախաձեռնել են Ֆրանսիան ու Գերմանիան` ստեղծելու համար «Ճամփորդությունների գրանցման եվրոպական էլեկտրոնային համակարգ`European ESTA: Այն նմանակում է ԱՄՆ նույնատիպ համակարգը, որով օտարերկրացի քաղաքացիներից պահանջվում է առցանց միջոցով նախապես իրազեկել ուղևորության մասին, եթե չի պահանջվում մուտքի արտոնագիր, ինչպես նաև 14 եվրո վճարել երկիր մուտք գործելու համար:

Նշվում է, որ Ֆրանսիայի և Գերմանիայի ղեկավարները կներկայացնեն այդ նախաձեռնությունն անդամ երկրների իրենց պաշտոնակիցներին ԵՄ ոչ պաշտոնական գագաթնաժողովից առաջ, որը կայանալու է սեպտեմբերի 16-ին Բրատիսլավայում, իսկ Եվրահանձնաժողովը համապատասխան օրենսդրական առաջարկները կներկայացնի նոյեմբերին:

ԵՄ տարածք մուտք գործելու կարգի կատարելագործումը պայմանավորված է ահաբեկչությանը հակազդելու անհրաժեշտությամբ: Ուկրաինան, օրինակ, արդեն առաջին տարին չէ, որ սպասում է Եվրամիության հետ մուտքի արտոնագրերի չեղարկմանը: