Պուտին. Ասադի հեռանալը պաշտոնից «ոչ այսօրվա գործ է, ոչ էլ վաղվա»

2 սեպտեմբերի 2016 - 17:56 AMT

PanARMENIAN.Net - ՌԴ նախագահ Վլադիմիր Պուտինն, անդրադառնալով Սիրիայի նախագահ Բաշար Ասադին ուղղված պաշտոնից հեռանալու կոչերին, հայտարարել է, որ անհրաժեշտ է սպասել բնական փոփոխությունների Սիրիայի ներսում:

«Երբ լսում ենք, որ Ասադը պետք է հեռանա, ինձ մոտ հարց է առաջանում. իսկ ի՞նչ հետևանքներ դա կունենա: Եվ ընդհանրապես, արդյո՞ք դա բխում է միջազգային իրավունքի նորմերից: Ավելի լավ չէ համբերությամբ լցվել ու, նպաստելով հասարակության կառուցվածքի փոփոխությանը, սպասել, թե ե՞րբ ներսում բնական փոփոխություններ տեղի կունենան»,-հայտարարել է ՌԴ նախագահը:

Նա կարծիք է հայտնել, որ դա տեղի չի ունենա «ոչ այսօր, ոչ էլ վաղը»:

«Գուցե դա է քաղաքական իմաստությունը` խառնաշփոթից խուսափել, առաջ չընկնել, այլ աստիճանաբար գործը տանել դեպի կառուցողական փոփոխություններ, այդ դեպքում` հանրության քաղաքական համակարգում»,-ասել է Պուտինը, հայտնում է «Կոմերսանտը»:

Ավելի վաղ ԱՄՆ վարչակազմի մամուլի քարտուղար Ջոշուա Էռնեստը հայտարարել էր, թե որքան շատ սատարի ՌԴ-ն Սիրիայի նախագահ Ասադին, այդքան բարդ կլինի հասնել քաղաքական կարգավորման այդ երկրում:

ՄԱԿ-ում ՌԴ մշտական ներկայացուցիչ Ալեքսեյ Բորոդավկինը հայտարարել էր, որ Վաշինգտոնն արդեն չի պահանջում Ասադի անհապաղ հրաժարականը:

Հղումներ թեմայով.

Kommersant.ru: Владимир Путин: надо ждать изменений в Сирии для естественного ухода Башара Асада

Sputnik. Putin Calls for Patience Instead of Demanding Assad's Ouster