Գերմանիայի ԱԳՆ-ն առաջարկում է միավորել Սիրիայի վերաբերյալ Ֆրանսիայի և ՌԴ բանաձևերը

PanARMENIAN.Net - Գերմանիայի ԱԳՆ-ն առաջարկում է միացնել Սիրիայի վերաբերյալ ՄԱԿ բանաձևի ռուսական և ֆրանսիական տարբերակները` վերջ դնելու համար Հալեպում շարունակվող մարտերին, հայտնում է ՏԱՍՍ-ը:

Այդ մասին հայտարարել է ԳԴՀ ԱԳՆ պաշտոնական ներկայացուցչի տեղակալ Զավսան Շեբլին: «Խոսքն այն մասին է, որ հնարավորություն գտնվի միացնելու բանաձևերը, որ ներկայացվի մեկ բանաձև, որը կստանա ՄԱԿ ԱԽ աջակցությունը և մենք, վերջապես, կկարողանանք վերջ տալ այն դժոխքին, որ շարունակվում է Սիրիայում»,-ասել է նա:

Նա պարզաբանել է, որ ՌԴ-ն չի սատարում թռիչքներից զերծ գոտու ստեղծմանը Հալեպում, մինչդեռ Գերմանիան, հակառակը, դա անհրաժեշտ պայման է համարում: Շեբլին ասել է նաև, որ Բեռլինն արդեն մատնանշել է Մոսկվային, որ հարկավոր է ազդել Սիրիայի նախագահ Բաշար Ասադի վրա` բարելավելու համար հումանիտար իրավիճակը:

Ռուսական նախագծով հավանություն է տրվում Սիրիայի գծով հատուկ դեսպանորդ Ստեֆան դե Միստուրայի նախաձեռնությանը Հալեպից գրոհայիններին դուրս բերելու վերաբերյալ, ինչպես նաև կոչ է արվում պահպանել ՌԴ և ԱՄՆ սեպտեմբերի 9-ի պայմանավորվածությունները:

Փաստաթուղթը կոչ է անում անհապաղ դադարեցնել ռազմական գործողությունները Հալեպում, որի պահպանման դիտարկումը կհանձնարարվի Ժնևում գործող Սիրիայի աջակցության միջազգային խմբին:

Գրոհայինները շարունակում են գնդակոծել Հալեպի բնակելի թաղամասերը` արևելյան շրջանների բնակիչներին որպես պատանդ պահելով, չարտորնելով հումանիտար բեռների առաքումը: Առողջապահության համաշխարհային կազմակերպության տվյալներով վերջին 2 շաբաթում քաղաքում ավելի քան 300 մարդ է զոհվել, մոտ 1000-ը տուժել է:

Հալեպում ստեղծված դրության պատճառով «ՀԱԼԷՊ» հասարակական կազմակերպությունը ստացել է ավելի քան 600 խնդրագիր Հալեպում բնակվող կարիքավոր և խնդիրների առջև հայտնված սիրիահայերից` օգնելու նրանց տեղափոխվել Հայաստան՝ ձեռք բերելով Լիբանանից դեպի Հայաստան մեկ ուղղությամբ տոմս։