Ճարտարապետ. Սբ Կաթողիկեի ապակե դռան նախագիծը հաստատվել էր մշակույթի նախարարությունում

PanARMENIAN.Net - Հանրության շրջանում քննարկման և առավելապես քննադատության առարկա դարձած Երևանի Սուրբ Աստվածածին (Կաթողիկե) եկեղեցու նոր՝ ապակե դուռը մնալու է: Այս մասին PanARMENIAN.Net ին հայտնեց Մայր Աթոռի ճարտարապետական բաժնի ճարտարապետ Մերի Դանիելյանը:

«Այդ եկեղեցու դրան հետ կապված երկու ծրագիր եմ ներկայացրել ՀՀ մշակույթի նախարարության գիտամեթոդական խորհրդի քննարկմանը: Առաջինը հին դռան վերականգնումն էր, երկրորդը՝ այս տարբերակը: Խորհուրդը երկրորդն է ընտրել», - ասաց նա:

Հարցին, թե կարող է արդյոք նախագիծը փոփոխվել՝ հաշվի առնելով հանրության բացասական վերաբերմունքը՝ Դանիելյանը բացասական է պատասխանել:

Կաթողիկե Սուրբ Աստվածածին եկեղեցին գտնվում է Երևանի Շահար թաղամասում, ներկայիս Աբովյան և Սայաթ-Նովա փողոցների խաչմերուկի անկյունում: Կաթողիկե Սուրբ Աստվածածին եկեղեցին, ըստ արևմտյան պատի մարմարյա սալին փորագրած խաչքարի, կառուցվել է մեծ երկրաշարժից հետո՝ 1693-1695թթ.:Դարաշրջանի ճարտարապետական ոճն առանձնապես արտահայտված է բազմանիստ գմբեթի, զույգ որմնասյուներով ընդգծված թմբուկի և հովհարաձև վեղարի ձևերում: