ՌԴ-ն համատեղ պայքարի մասին համաձայնագիր է կնքել սիրիացի քրդերի հետ

PanARMENIAN.Net - Ռուսական կողմն ու քրդական ջոկատները համատեղ պայքարի մասին համաձայնագիր են ստորագրել: Խմբավորման ներկայացուցիչը հայտարարել է, որ համաձայնագիրն ուժի մեջ է մտել մարտի 20-ին:

Ռուսաստանը ռազմակայան կկառուցի Սիրիայի հյուսիս-արևմուտքում: Այդ մասին հայտնել է Reuters-ը քրդերի Ժողովրդական ինքնապաշտպանության ջոկատների (YPG) ներկայացուցիչ Ռեդուր Հալիլի վրա հղումով, հայտնում է ՌԲԿ-ն:

Ըստ Հալիլի, ռուս զինծառայողներն արդեն ժամանել են զրահամեքենաներով Էֆրին քաղաքի մերձակայքում գտնվող նոր ռազմակայանի տարածք՝ դա Հալեպ գավառի հյուսիսում է: Նա չի ասել, թե քանի զինվորական այնտեղ կա և որտեղ է լինելու ռազմակայանը:

Մինչդեռ ՌԴ Պն-ում ռազմակայանի մասին լուրերը հերքում են՝ նշելով, որ Սիրիայի տարածքում նոր ռուսական ռազմակայան ստեղծելու ծրագիր չկա:

Խոսքը ոչ թե ռազմակայանի կառուցման, այլ քրդական ինքնապաշտպանական ջոկատների համար ուսումնական կենտրոնի ստեղծման մասին է: Այդ մասին ասել է ՌԴ ԶՈՒ պաշտոնաթող գեներալ Վիկտոր Մուրախովսկին: Ուսումնական կենտրոնում ռուս հրահանգիչները մասնագետներ կպատրաստեն, որոնք աշխատելու են ծանր զինատեսակների հետ: Ըստ նրա, այդպիսի կենտրոն բացելու համար հատուկ շինություն կառուցելու կարիք չկա:

Քրդերը վերահսկում են Սիրիայի հյուսիս-արևելքում և հյուսիս-արևմուտքում գտնվող տարածքները, որտեղ պայքարում են ահաբեկչական խմբավորումների դեմ: Վերջին շաբաթներին ջոկատները հարձակում են սկսել Ռաքքայի ուղղությամբ: Քրդերին սատարում են ամերիկյան ռազմական խորհրդականներ, ԱՄՆ-ն նաև զենք ու զրահատախենիկա է տրամադրում քրդերին:

Քրդական 2 անկլավի միացմանը Սիրիայի հյուսիսում խանգարում են Թուրքիայի զինվորականները և Սիրիայի ազատ բանակի ջոկատները, որոնք 2016-ի օգոստոսից «Եփրատի վահանը» գործողություն են իրականացնում Սիրիայի հյուսիսում: