Իջևանի պահպանության բաժնում 38,5 մլն դրամ են յուրացրել

17 հուլիսի 2018 - 13:42 AMT

PanARMENIAN.Net - ՀՀ ոստիկանությունը Իջևանի պահպանության բաժնի նախկին պետն ու մի քանի ծառայողներ ոստիկանության ՊՊԳՎ արտաբյուջետային միջոցներից մոտ 38,5 մլն դրամ են յուրացրել, հայտնում է ՀՀ ոստիկանության մամուլի ծառայությունը:

Նշվում է, որ գումարի մի մասը վերականգնվել է աուդիտի, իսկ մյուս մասը՝ ծառայողական քննության ընթացքում։

Բացի այդ, Դիլիջանի պահպանության բաժանմունքի հաշվապահի պարտականությունները ժամանակավոր կատարելիս Իջևանի պահպանության բաժնի նախկին հաշվապահը 2017 թվականի մայիս-օգոստոս ամիսներին իրեն ավելի է վճարել ավելի քան 4,5 մլն դրամ, որը վերականգնվել է ամբողջությամբ։ Տավուշի պահպանության բաժանմունքի նախկին հաշվապահը 2016 թվականի եւ 2017 թվականի հունվար-նոյեմբեր ամիսների ընթացքում իր աշխատավարձի հաշվեհամարին ավելի է վճարել ընդհանուր 380.857 դրամ, որը հետագայում վերականգնվել է ամբողջությամբ։ Ընդհանուր վերականգնված գումարը կազմում է մոտ 43,4 մլն դրամ։

Ծառայողական քննության նյութերն ուղարկվել են ՀՀ հատուկ քննչական ծառայություն՝ նրանց արարքներին քրեաիրավական գնահատական տալու համար։