Ուր գնալ Անկախության օրը. Սելֆիի ժամ, համերգներ և հրավառություն

PanARMENIAN.Net - Սեպտեմբերի 21-ին Հայաստանը նշում է Անկախության 27-րդ տարեդարձը: Երևանում կանցկացվեն բազմաթիվ միջոցառումներ, որոնք միտված են գոհացնելու ամենատարբեր նախասիրությունների տեր մարդկանց:

Ժամը 14:00-ին Հանրապետության Հրապարակում կմեկնարկի սելֆիի ժամը, որի ընթացքում ցանկացողները կկարողանան լուսանկարվել հայտնի անձանց հետ: Հրապարակում տեղադրված են նաև սննդի և ժամանցի տաղավարներ: Իսկ 16:00-ին կմեկնարկեն մանկական միջոցառումները:

15:40-ին դասական երաժշտություն կհնչի Շահումյանի հրապարակում:

16:00-ին Աբովյան փողոցում կհավաքվեն ջազ/վինիլի սիրահարները, իսկ Ամիրյանում՝ ռոք նախընտրողները: Նույն ժամին հեղինակային և փոփ երաժշտություն կհնչի Խաչքարերի պուրակում: Հանրապետության-Տիգրան Մեծ խաչմերուկում կհնչեն հայկական ժողովրդական մեղեդիներ:

Տոնական միջոցառումները կավարտվեն 23:00-ին հրավառությամբ:

ՀՀ վարչապետի աշխատակազմի ղեկավար Էդուարդ Աղաջանյանն ավելի վաղ հայտարարել էր, որ միջոցառումների ֆինանսական մասը չի գերազանցել 100 մլն դրամի շեմը: Աղաջանյանը նաև նկատել է, որ միջոցառումները չեն ստվերի Երևանի ավագանու քարոզարշավի վերջին օրը` ընդգծելով, որ իրենք պատրաստվում են հրավեր ուղարկել քաղաքապետի 12 թեկնածուներին՝ մասնակցելու «Սելֆիի ժամ» խորագրի ներքո անցկացվելիք միջոցառմանը։

1990 թվականի օգոստոսի 23-ին ՀՀ գերագույն խորհուրդը ընդունել է ՀՀ Անկախության հռչակագիրը, որտեղ նշված էր, որ ՀԽՍՀ-ն կազմալուծվում է և ձևավորվում է նոր պետություն՝ Հայաստանի Հանրապետությունը: 1991 թվականի սեպտեմբերի 21-ին հայ ժողովուրդը անկախության հանրաքվեի ժամանակ կողմ է քվեարկել ԽՍՀՄ կազմից դուրս գալու օգտին: