Ցուցարարները վրաններ են տեղադրել Թբիլիսիի կենտրոնում

PanARMENIAN.Net - Թբիլիսիի կենտրոնում սահմանադրական փոփոխությունների տապալման դեմ բողոքող ցուցարարները վրաններ են տեղադրել Ռուսթավելու պողոտայի լայնությամբ՝ խորհրդարանի դիմաց: Ցուցարարների գլխավոր պահանջը արտահերթ խորհրդարանական ընտրությունների անցկացումն է համամասնական կարգով:

«Մենք մեկ պահանջ ունենք՝ բոլորը մեկի դեմ. Համամասնական ընտրություններ առանց Բիձինա Իվանիշվիլու: Սա է մեր պահանջը»,-ասել է «Ամոթ է» երիտասարդական շարժման առաջնորդներից Շոթա Դիղմելաշվիլին:

Ցուցարարների թվում են երիտասարդական շարժման անդամները, տարբեր ընդդիմադիր կուսակցությունների ներկայացուցիչներ, քաղաքացիական ակտիվստներ, հայտնում է «Sputnik Գրուզիան»:

Նոյեմբերի 14-ի երեկոյան ցուցարարների մի մասը իշխող «Վրացական երազանք՝ ժողովրդավարական Վրաստան» կուսակցության ղեկավար Բիձինա Իվանիշվիլիի հրաժարականն է պահանջել նրա նստավայրի մոտ:

Իշխող «Վրացական երազանք՝ ժողովրդավարական Վրաստան» կուսակցությունը դեռ ամռանն էր համաձայնություն տվել խառը ընտրակարգից համամասնականի անցնելուն՝ Թբիլիսիի կենտրոնում ցույցի դուրս եկած երիտասարդության և ընդդիմության ճնշման տակ: Այն ժամանակ կողմ արտահայտվեց իշխող կուսակցության 93 անդամ, սակայն այժմ պարզվում է, որ մեծամասնականով ընտրվածներից շատերը դեմ են դրան: Նույնիսկ չնայած այն հանգամանքին, որ ընդդիմությունը կողմ է քվեարկել ուղղումներին, ընդհանուր առմամբ հաջողվել է ստանալ միայն 101 քվե, անհրաժեշտ 113-ի փոխարեն: