Հավաքների սահմանափակումը կտարածվի ամբողջ ՀՀ-ում

PanARMENIAN.Net - Արտակարգ դրություն հայտարարելու մասին կառավարության որոշման՝ հավաքների և հանրային միջոցառումների անցկացման սահմանափակումները և արգելքները մարտի 17-ի ժամը 12։00-ից կտարածվեն ՀՀ ամբողջ տարածքի վրա, հայտարարել է պարետ Տիգրան Ավինյանը։

Սա վերաբերում է հանրային միջոցառումների կազմակերպման, անցկացման և դրանց մասնակցության արգելքին։

Այս որոշման իմաստով հանրային միջոցառումներ են 20 և ավելի անձանց մասնակցությամբ անցկացվող համերգները, ցուցահանդեսները, ցուցադրությունները, թատերական ներկայացումները և սպորտային, մշակութային, կրթական այլ միջոցառումները, ժամանցային միջոցառումները, տոնական և հիշատակի միջոցառումները, ներառյալ, բայց չսահմանափակվելով ծննդյան (տարեդարձի), հարսանյաց (նշանադրության), հոգեհանգստի և թաղման միջոցառումները։

«Հոգեհանգստի և թաղման միջոցառումների դեպքում կփորձենք մասնակցության փոքր-ինչ ավելի լայն հնարավորություններ տալ՝ միաժամանակ հետևելով որպեսզի մարդկանց կուտակումներ արարողության ժամանակ չլինեն», - ասվում է հայտարարությունում:

Մարտի 16-ից ապրիլի 14-ը Հայաստանում կորոնավիրուսի համաճարակի կանխարգելման նպատակով արտակարգ դրություն է սահմանվել։

ՀՀ-ում մարտի 16-ից մինչև ապրիլի 14-ը արտակարգ դրություն է հայտարարված՝ կորոնավիրուսի տարածումը կանխելու համար:

Կադացեք նաև․ Կորոնավիրուսից խուսափելու համար խորհուրդներ` ԱՀԿ-ից

Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով: