Բաժանմունք այցելել պետք չէ. Փոստի աշխատողները գումարը թոշակառուին կհասցնեն

PanARMENIAN.Net - «Հայփոստի» աշխատակիցներն անձամբ կայցելեն շահառուներին՝ կանխիկ եղանակով ստացվող կենսաթոշակները և նպաստները նրանց բնակության վայր հասցնելու նպատակով, փոստային բաժանմունք այցելելու անհրաժեշտություն չկա։

Կենսաթոշակների և նպաստների տրամադրման բնականոն գործընթացն ապահովելու նպատակով՝ ՀՀ աշխատանքի և սոցիալական հարցերի նախարարության և «Հայփոստ» ՓԲԸ-ի միջև համաձայնություն է ձեռք բերվել, հայտնում են հայկական տեղեկատվական միասնական կենտրոնից:

«Քաղաքացիների տներ այցելող «Հայփոստի» բոլոր աշխատակիցներն ապահովված կլինեն անհատական պաշտպանիչ միջոցներով՝ դիմակներով, ինչպես նաև ախտահանիչ միջոցներով»,- հայտնում են կենտրոնից:

Նշվում է նաև, որ կենսաթոշակների և նպաստների ուշացումներ չեն լինի:

Աշխատանքի և սոցիալական հարցերի նախարարությունը ևս մեկ անգամ հորդորել է բոլոր քաղաքացիներին զերծ մնալ «Հայփոստի» բաժանմունքներ և այլ մարդաշատ վայրեր այցելելուց:

ՀՀ-ում մարտի 16-ից մինչև ապրիլի 14-ն արտակարգ դրություն է՝ կորոնավիրուսի տարածումը կանխելու համար: Մարտի 24-ի առավոտվա դրությամբ երկրում վարակի 235 հաստատված դեպք կա, երկու հոգի առողջացել է:

Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով:

Ընթերցեք նաև․ Կորոնավիրուսից խուսափելու համար խորհուրդներ` ԱՀԿ-ից