Աբրահամյան․ Պատգամավորի կարգավիճակում անելիքս ավարտված է

PanARMENIAN.Net - ՀՀ ԱԺ «Իմ քայլը» խմբակցության պատգամավոր Գայանե Աբրահամյանը հայտարարել է լիազորությունների դադարեցման մասին։

«Այս օրերին փորձել եմ հնարավոր բոլոր ջանքերը ներդնել իրավիճակը փոքր-ինչ մեղմելու և վատթարագույնը կանխելու համար, սակայն այս պահից ՀՀ Ազգային Ժողովի պատգամավորի կարգավիճակում անելիքս համարում եմ սպառված: Ներողություն եմ խնդրում բազմաթիվ սխալների համար», - գրել է նա։

Աբրահամյանը հայտարարել էր մանդատից հրաժարվելու մասին սեպտեմբերի 25-ի՝ն պատերազմից 2 օր առաջ, նշելով, որ կարևոր է իր սկզբունքների և արժեքների հետ ներդաշնակ լինել` մեր պետության ու ժողովրդի ապագայի համար կարևորագույն որոշումներ կայացնելիս։ Սակայն պատերազմը սկսվելուց հետո նա շարունակել է գործունեությունը։

Աբրահամյանի հայտարարությունն արվել է գիշերվա 1-ից հետո ու ժամանակային առումով հետևել է Փաշինյանի ֆեյսբուքյան գրառմանը, որտեղ նա հայտարարել էր, որ սպասում է Երևանում առաջնագծի զինվորներին՝ լուծելու «պատերի տակ վնգստացողների» հարցերը։

Ավելի վաղ Բարձրագույն դատական խորհրդի ղեկավար Ռուբեն Վարդազարյանը՝ հիշելով տարիներ առաջ Փաշինյանի՝ «պատերի տակ վնգստացող» դատավորների մասին արտահայտությունը, ասել էր, որ այս պահին որոշվում է, արդյոք դատական իշխանությունը համապատասխանում է Փաշինյանի բնութագրմանը։ Դրանից հետո դատարանը բաց էր թողել նախօրեին վարչապետի սպանության փորձի կազմակերպման մեջ մեղադրված ԱԱԾ նախկին պետ Արթուր Վանեցյանին։