ԶԼՄ․ ՌԴ և Թուրքիայի միջև ավիահաղորդակցությունն ապրիլի 12-ից կարող է սահմանափակվել

10 ապրիլի 2021 - 12:11 AMT

PanARMENIAN.Net - Ապրիլի 12-ից ավիահաղորդակցությունը ՌԴ և Թուրքիայի միջև կարող է սահմանափակվել համաճարակային իրավիճակի պատճառով, տեղեկացնում է «Իզվեստիան»՝ տրանսպորտի նախարարությունում և երկու խոշորագույն տուրօպերատորների շրջանում իր աղբյուրներին հղումով։

Ըստ պարբերականի՝ սահմանափակումները կարող են ուժի մեջ մտնել ապրիլի 12-ից, սակայն ամբողջական դադարեցում չի նախատեսվում։ Կարող են արգելվել չարթերային թռիչքները, ինչպես նաև կարող է 14 օրյա կարանտին սահմանվել Թուրքիայից ժամանողների համար։ Արտագնա թռիչքների մի մասը կարող է պահպանվել։

Ընդ որում, Պետդումայի կրթության և գիտության կոմիտեի նախագահի առաջին տեղակալ, ՌԴ նախկին գլխավոր սանիտարական բժիշկ Գենադի Օնիշչենկոն կարծիք է հայտնել, որ ավելի լավ կլինի՝ այս տարի ռուսաստանիցներն արձակուրդներն անցկացնեն երկրի ներսում, իսկ այցերը Թուրքիա այժմ անվտանգ չեն, քանի որ այդ երկրի առողջապահական համակարգը չի կարողանում դիմակայել համաճարակային իրավիճակին։

Թուրքիայի առողջապահության նախարարությունն ապրիլի 8-ին գրանցել էր Covid-19-ով վարակվելու օրական ամենամեծ աճը՝ 55,941 դեպք։ Ապրիլի 9-ի ցուցանիշը՝ 55,791, ևս մոտ էր ռեկորդայինի: Երկրում պարետային ժամ է սահմանված։