Լավրով. Ուկրաինայում սկսվում է հատուկ գործողության հաջորդ փուլը

PanARMENIAN.Net - ՌԴ ԱԳ նախարար Սերգեյ Լավրովը հայտարարել է, որ Ուկրաինայում սկսվում է «հատուկ գործողության հաջորդ փուլը»։ Այդ մասին նա ասել է India Today հեռուստաալիքին հարցազրույցում։

«Ուկրաինայում հատուկ ռազմական գործողությունը, ինչպես նախապես հայտարարվել էր, Դոնեցկի և Լուգանսկի հանրապետությունների ամբողջական ազատագրումն է։ Այս գործողությունը շարունակվելու է, հիմա դրա հաջորդ փուլն է սկսվում։ Կարծում եմ՝ հիմա կարևոր պահ է լինելու»,- ասել է Լավրովը, գրում է ՌԻԱ Նովոստին։

Նա ասել է, որ ճգնաժամը կարող էր վաղուց հանգուցալուծվել, եթե Ուկրաինայի նախագահ Վլադիմիր Զելենսկին գործակցեր և ձգտեր Մինսկի համաձայնագրերի կատարմանը։ Նրա կարծիքով, միաժամանակ «Արևմուտքը դավաճանել է Զելենսկուն»՝ օգտագործելով նրան Ռուսաստանի դեմ։

Փետրվարի 24-ից ՌԴ-ն պատերազմ է վարում Ուկրաինայի դեմ՝ առաջանալով երկրի տարածքում, այդ թվում՝ Ղրիմից, Բելառուսից, և Դոնբասից։ ՌԴ նախագահը հայտարարել է, որ նպատակը մարդկանց պաշտպանելն է, որոնք «ենթարկվում են ցեղասպանության Կիևի ռեժիմի կողմից»։ Պուտինը հավելել է, որ ՌԴ-ն ձգտելու է Ուկրաինայի «ապառազմականացմանը և ապանացիֆիկացիայի»։ Ուկրաինայի ամբողջ տարածքում ռազմական դրություն է հայտարարվել։ Զելենսկին հայտարարել է ՌԴ հետ հարաբերությունները խզելու մասին։