Կառավարությունը հետաձգել է Անկախության օրվա միջոցառումը

PanARMENIAN.Net - Կառավարությունը հետաձգել է Անկախության օրվան նվիրված «Մեր ժամանակների հերոսը» մրցանակաբաշխությունը։ Այդ մասին հայտնել են գործադիրի Տեղեկատվության և հասարակայնության հետ կապերի վարչությունից, տեղեկացնում է Հանրային ռադիոն։

Միջոցառումը պետք է տեղի ունենար սեպտեմբերի 21-ին։

Նշվում է, որ այն հետաձգվում է Հայաստանի դեմ Ադրբեջանի լայնածավալ ագրեսիայի պատճառով:

Սեպտեմբերի 13-ին՝ ժամը 00:05-ից Ադրբեջանի ԶՈւ ստորաբաժանումները Գորիսի, Կապանի, Ջերմուկի, Վարդենիսի, Սոթքի ուղղությամբ խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ, կիրառվել են նաև ԱԹՍ-ներ, հրետանի, ականանետեր՝ թիրախավորելով թե ռազմական, և թե քաղաքացիական ենթակառուցվածքները։ Սեպտեմբերի 14-ի երեկոյից հրադադար է հաստատվել, սակայն իրավիճակը շարունակում է մնալ ծայրահեղ լարված։

Սեպտեմբերի 19-ի դրությամբ հայկական կողմը 207 զոհ և անհետ կորած ունի, ինչպես նաև 20 գերի։ Այդ մասին հայտարարել է ՀՀ ԱԽ-ն։ ‌