Փաշինյան․ Արտագնա աշխատանքի մեկնողները հաշվե՞լ են՝ ճանապարհների կառուցմամբ ինչքան պակաս գումար են տալիս տեխսպասարկմանը

PanARMENIAN.Net - Վարչապետ Նիկոլ Փաշինյանը, անդրադառնալով արտագնա աշխատանքի մեկնորղների հարկման հետ կապված բողոքներին, հիշեցրել է, որ 2018 թվականից մինչև այսօր Գեղարքունիքի մարզում 452 կմ ճանապարհ է կառուցվել՝ միայն պետական ծրագրերով։

«Արտագնա աշխատանքի մեկնող մեր հայրենակիցները հաշվե՞լ են, թե էս ճանապարհների կառուցման արդյունքում իրենք ինչքան պակաս գումար են տալիս ավտոտեխսպասարկման համար, ինչքան պակաս ավտոպահեստամաս են ձեռք բերում և այլն և այսպես շարունակ»,- հայտարարել է Փաշինյանը, գրում է Panorama.am-ը։

Այդ մասին նա ասել է ՀՀ կառավարության ծրագրի (2021-2026 թթ.) 2023 թվականի կատարման ընթացքի և արդյունքների զեկույցի քննարկման ժամանակ։

Նա ասել է, որ երկրում շարունակում է մնալ ստվերային տնտեսությունը։

Պետական եկամուտների կոմիտեի նախագահ Ռուստամ Բադասյանը, անդրադառնալով արտագնա աշխատանքի մեկնող քաղաքացիների դժգոհություններին, ասել է, որ կկարողանան որոշակի օրենսդրական փոփոխություններով հիմա մեղմել, վերացնել այս ազդեցությունները և գնալ փուլային տարբերակով հայտարարագրման համակարգի սահուն ներդրման ուղղությամբ։

«Ստվերային տնտեսության մեջ մենք պետք է նկատի ունենանք նաև այն դեպքերը, երբ մենք գործ ունենք դեպքերի հետ, որ հարկային վարչարարություն չենք իրականացրել, որն օրենքով նախատեսված էր, բայց դե ֆակտո չէր իրականացվում»,- ասել է Փաշինյանը և հայտնել, որ ՀՀ-ի 21 հազար քաղաքացի արդեն հայտարարագրել են, որ իրենք վարձով բնակարան են տալիս

Ռուստամ Բադասյանը ճշտել է, որ15 հազար քաղաքացի ներկայացրել են 21 հազար հայտարարություն, որոնց 90%-ից ավելը նախկինում չեն հայտարարագրել։

Փետրվարի 21–ին «խոպանչիները» փակել էին Երևան–Մարտունի ճանապարհը և բողոքում են ՀՀ պետական եկամուտների կոմիտեի օրենսդրական փոփոխությունների դեմ։ Համաձայն այդ փոփոխությունների` արտագնա աշխատանքի մեկնողներն այլ պետություններում ստացած եկամտից պետք է Հայաստանում եկամտային հարկ վճարեն։ «Խոպանչիները» վերջին օրերին են ծանուցում ստացել, որ իրենք պետք է հարկվեն: