ԵԽԽՎ աշնանային նստաշրջանում հրատապ քննարկվելու է Ադրբեջանում մարդու իրավունքների վատթարացող վիճակը

PanARMENIAN.Net - ԵԽԽՎ աշնանային նստաշրջանում, որը սեպտեմբերի 30–ից հոկտեմբերի 4–ն անցնելու է Ստրասբուրգում, հրատապ կարգով քննարկվելու է Ադրբեջանում մարդու իրավունքների հետ կապված իրավիճակի վատթարացումը։

Հարցը ներառված է նստաշրջանի առաջին իսկ օրվա նախնական օրակարգում հետևյալ ձևակերպմամաբ․Հրատապ լսումներ «Ադրբեջանում մարդու իրավունքների, օրենքի գերակայության և ժողովրդավարության հետ կապված իրավիճակի վատթարացումը» թեմայով», գրում է Turan.az–ը։

Եթե այդ օրակարգը հաստատվի, ըստ աղբյուրների Եվրոպայի խորհրդում, առարկայական քննարկումները տեղի կունենան հոկտեմբերի 3–ին։ Արդյունքում կարող են ընդունվել ԵԽ Նախարարների կոմիտեին ուղղված առաջարկություններ՝ Ադրբեջանի դեմ կազմակերպության նկատմամբ ստանձնած պարտավորությունները չկատարելու համար միջոցներ ձեռնարկելու վերաբերյալ։

Հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Օգոստոսին Ադրբեջանում արգելել են որոշմանը կողմ քվեարկած պատգամավորների մուտքը երկիր։ Որոշմանը կողմ էր քվեարկել 76 պատգամավոր, դեմ՝ 10–ը, «ձեռնպահ»՝ 4–ը։

Կազմակերպությունում Գերմանիայի պատվիրակության ղեկավար Ֆրանկ Շվաբեն հայտարարել է, որ ԵԽԽՎ վերադառնալու համար Ադրբեջանն առանց որևէ նախապայմանի պետք է կատարի ԵԽԽՎ բոլոր կանոնները։ Նա այդ մասին ասել է, մեկնաբանելով Ադրբեջանի նախագահի այն հայտարարությունը, թե ԵԽԽՎ պատգամավորների համար Ադրբեջան մուտքի արգելքը կվերացվի այն ժամանակ, երբ կվերականգնվեն ադրբեջանական պատվիրակության իրավունքները կազմակերպությունում։