Թուրքիան օպտիմալ քաղաքականություն է վարում Հայաստանի հարցում: Այդ մասին հայտարարել է ՌԴ-ում Թուրքիայի դեսպան Հալիլ Ակնջին: Նրա խոսքերով, Թուրքիայի եւ Հայաստանի միջեւ խնդիրները չեն սպառվում փակ սահմանով: «Կան հարաբերություններ Թուրքիայի եւ Ադրբեջանի միջեւ, որոնց մասին մենք ասում ենք, որ դա «մեկ ազգ` երկու պետություն է»,-ասել է Ակնջին: Նա նաեւ նշել է, որ տարբերություն կա պատմության որոշ իրադարձությունների մեկնաբանման մեջ:

«Վերջերս Թուրքիան այնպիսի քաղաքականություն է վարում, որ խնդիրներ չունենա հարեւանների հետ: Օրինակ, Ստամբուլից Հայաստան ավիաչվերթներ են իրականացվում: Ցամաքային սահմանը փակ է, բայց օդայինը բաց է: Մյուս կողմից, պետք է նայել, թե ինչ է անում Հայաստանը: Այսինքն դիվանագիտական հարաբերությունները պետք է վերականգնվեն, սակայն զուգահեռաբար պետք է լուծվի Ղարաբաղի խնդիրը եւ հայ-ադրբեջանական հարաբերությունների խնդիրը»,-ասել է դեսպանը:

«Թուրքիան բարի կամք դրսեւորեց, եւ անցյալ տարի մեր նախագահն այցելեց Երեւան` դիտելու ֆուտբոլային խաղը: Մենք իրատես ենք այս հարցում եւ օպտիմալ քաղաքականություն ենք վարում Հայաստանի հանդեպ: Սակայն Հայաստանը պետք է հասկանա, որ ինքը եւս պետք է քայլեր ձեռնարկի: Մեր անկեղծ ցանկությունն է, որպեսզի Կովկասում բոլոր սահմանները բաց լինեն եւ բոլորը բարեկամներ լինեն»,-ասել է Ակնջին, հաղորդում է ՌԲԿ գործակալությունը: