Լուկաշենկոն հայտարարել է, որ մտադիր չէ կրկին առաջադրվել նախագահի պաշտոնում

PanARMENIAN.Net - Բելառուսի նախագահ Ալեքսանդր Լուկաշենկոն Time ամսագրին տված հարցազրույցում հայտնել է, որ այլևս չի դիտարկում նախագահական ընտրություններին կրկին մասնակցելու հնարավորությունը։

«Ոչ, ես հիմա այլևս չեմ նախատեսում, այլևս չեմ նախատեսում», — պատասխանել է նա, գրում է Gazeta.ru-ն։

Ավելի վաղ Լուկաշենկոն նշել է, որ «մի փոքր երկար է մնացել իշխանության»՝ ղեկավարության փոփոխությունը նախապատրաստելու համար։ Նրա խոսքով՝ նոր սերունդը վերջապես իշխանության է գալու, սակայն «անհրաժեշտ է դիտարկել և եզրակացություն անել, թե ինչի է ունակ մեր երիտասարդությունը»։

Նա նաև ընդգծել է, որ Բելառուսի ներկայիս իշխանությունները «սիրում են իրենց երկիրը, ցանկանում են պահպանել իրենց երկիրը արդեն ոչ այնքան իրենց, որքան իրենց երեխաների համար»։

Լուկաշենկոն ասել է նաև, որ չի տեսնում իր կրտսեր որդի Նիկոլային երկրի խոշոր քաղաքական գործիչների շարքում և խնդրել է նրան չանվանել իր հետնորդ, գրում է ՏԱՍՍ–ը։

«Ոչ, նա ժառանգ չէ։ Ես այդպես էլ գիտեի, որ դու ուզում ես այդ մասին հարցնել։ Ոչ, ոչ։ Դու նրան հարցրու, կարող ես նրան շատ ուժեղ վիրավորել դրանով»,–ասել է նա։

Լուկաշենկոյի խոսքով՝ Նիկոլայը «որոշ չափով ընդդիմադիր է», թեև աջակցում է իր գործունեությանը, «հասկանում է, ամեն ինչում կողմնորոշվում է»։

Այս տարվա հունվարի 27-ին Լուկաշենկոն կրկին հաղթանակ է տարել Բելառուսի նախագահական ընտրություններում՝ հավաքելով ձայների 86.82 տոկոսը։ 70-ամյա քաղաքական գործիչը Բելառուսի առաջին և առայժմ միակ նախագահն է, ով այս պաշտոնը զբաղեցնում է անընդմեջ 1994 թվականի հուլիսի 20-ից։ Իր ղեկավարության ընթացքում նա մասնակցել է 1994, 2001, 2006, 2010, 2015, 2020 և 2025 թվականների նախագահական ընտրություններին։