Իրանը սպառնացել է հարվածել ԱՄՆ և Իսրայելի համալսարաններին տարածաշրջանում

PanARMENIAN.Net - Իրանը հայտարարել է, որ կարող է հարվածներ հասցնել տարածաշրջանում գործող ամերիկյան և իսրայելյան համալսարաններին՝ ի պատասխան իր բուհերի վրա իրականացված հարձակումների։

Ըստ իրանական աղբյուրների, հարվածներ են հասցվել Իսֆահանի տեխնիկական համալսարանին և Թեհրանի գիտության և տեխնոլոգիաների համալսարանին։

Ըստ Fars գործակալության՝ Իսլամական հեղափոխության պահապանների կորպուսը (ԻՀՊԿ) X սոցիալական ցանցում հայտարարել է, որ եթե ԱՄՆ վարչակազմը ցանկանում է, որ տարածաշրջանում իր համալսարանները զերծ մնան պատասխան հարվածներից, ապա մինչև մարտի 30-ի կեսօր՝ Թեհրանի ժամանակով, պետք է դատապարտի համալսարանների ռմբակոծությունները, հայտնում է Deutsche Welle-ն:

Տարածաշրջանում գործող ամերիկյան համալսարանների աշխատակիցներին, դասախոսներին և ուսանողներին, ինչպես նաև հարակից տարածքների բնակիչներին խորհուրդ է տրվել պահել առնվազն մեկ կիլոմետր հեռավորություն համալսարանների տարածքներից։

Մի շարք ամերիկյան համալսարաններ մասնաճյուղեր ունեն Պարսից ծոցի երկրներում, մասնավորապես՝ Տեխասի A&M համալսարանը Քաթարում և Նյու Յորքի համալսարանը Արաբական Միացյալ Էմիրություններում։

Միևնույն ժամանակ, Բեյրութի ամերիկյան համալսարանը անցել է հեռավար ուսուցման առաջիկա երկու օրերի համար՝ ԻՀՊԿ հայտարարությունից հետո։

«Ներկայումս մենք չունենք մեր համալսարանի, դրա մասնաշենքերի կամ բժշկական կենտրոնների հասցեին ուղղված անմիջական սպառնալիքների ապացույցներ։ Միևնույն ժամանակ, զգուշության նկատառումներից ելնելով, երկուշաբթի և երեքշաբթի օրերին կաշխատենք ամբողջությամբ առցանց ձևաչափով՝ բացառությամբ հիմնական գործառույթներ իրականացնող անձնակազմի», - հայտարարել է Լիբանանի մայրաքաղաքում գտնվող մասնավոր համալսարանի ղեկավարությունը։

«Ամերիկա-իսրայելական ագրեսիայի իրական նպատակը Իրանի դեմ մեր երկրի գիտական հիմքն ու մշակութային ժառանգությունը ոչնչացնելն է՝ համակարգված հարվածներ հասցնելով համալսարաններին, գիտահետազոտական կենտրոններին, պատմական հուշարձաններին և ականավոր գիտնականներին», - գրել է Իրանի ԱԳՆ պաշտոնական ներկայացուցիչ Էսմայիլ Բաղաին X սոցիալական ցանցում։

ԱՄՆ-ն և Իսրայելը փետրվարի 28-ից սկսել են ռազմական գործողություններ Մերձավոր Արևելքում՝ օդային հարվածներ հասցնելով Իրանին։ Թեհրանը պատասխանել է հրթիռային և անօդաչու թռչող սարքերի հարձակումներով Իսրայելի, Պարսից ծոցի մի շարք երկրների և տարածաշրջանում ամերիկյան օբյեկտների դեմ։