ԵՄ-ն պատրաստ է բանակցել Իրանի հետ միջուկային ծրագրի շուրջ

PanARMENIAN.Net - Եվրամիությունը պատրաստ է վերսկսել բանակցություններն Իրանի հետ միջուկային ծրագրի շուրջ: Այդ մասին հայտարարել է Եվրամիության արտաքին քաղաքականության գծով գերագույն հանձնակատար Խավիեր Սոլանան:



Նրա խոսքերով, ԵՄ-ն պատրաստ է գնալ այդ քայլին, անկախ նախագահական ընտրություններից հետո Թեհրանում բողոքների ճնշման մեթոդներից: «Եվրամիությունը մտադիր չէ միջամտել Մերձավոր Արեւելքի երկրների ներքին գործերին»,-ասել է Սոլանան, հաղորդում է Associated Press-ը:



Հունիսի 12-ին Իրանում կայացան նախագահական ընտրություններ, որտեղ մեծ առավելությամբ հաղթանակ տարավ գործող նախագահ Մահմուդ Ահմադինեժադը, որը հավաքեց ձայների 62,6 տոկոսը, ինչը երկու անգամ ավել է, քան նրա մրցակից` նախկին վարչապետ Միր Հոսեյն Մուսավիի հավաքած ձայները, որը չի ընդունում ընտրությունների արդյունքները եւ մեղադրում է իշխանություններին արդյունքները կեղծելու մեջ:



Ընդդիամությունը դուրս է եկել փողոց արդարության պահանջով: Բողոքի ցույցերը շարունակվում են Թեհրանում եւ Իրանի մյուս խոշոր քաղաքներում արդեն մի քանի օր եւ ամենահզորն են Իսլամական Հանրապետության գոյության 30 տարվա ընթացքում: