Շառլ Ազնավուրը կլիպ կնկարահանի Հաիթիի երկրաշարժի տուժածների համար

PanARMENIAN.Net - Հանրաճանաչ շանսոնյե Շառլ Ազնավուրը եւ եւս 34 երաժիշտներ, առավելապես Ֆրանսիայի ծովային տարածքներից եւ աֆրիկյան երկրներից, Փարիզում կնկարահանեն «Ժեստ թանկագին Հաիթիի համար» բարեգործական տեսահոլովակը:



Trace TV երաժշտական ալիքը հանդես է եկել նախաձեռնությամբ` հավաքել ֆրանսալեզու էստրադայի աստղերին, աջակցելու համար Հաիթիի բնակչությանը, որը տուժել է ավերիչ երկրաշարժից: Կոչին արձագանքել են ֆրանսիական Neg`Marrons ռեգի խումբը, որը գրել է երաժշտությունը, ռեպ-երաժիշտներ Passi-ն, Grand Corps Malade-ն եւ երգիչ Յուսսու Նդուրը: Յուրաքանչյուր մասնակից կգրի տեքստի մի հատվածը: Trace TV կսկսի տեսահոլովակի հեռարձակումն արդեն երկուշաբթի եւ կփոխանցի այն բոլոր հեռուստաալիքներին: Երգը կոչ կանի նվիրատվություններ անել Կարմիր Խաչի եւ «Բժիշկներ առանց սահմանների» կազմակերպությանը` աջակցելու համար Հաիթիի բնակիչներին, հաղորդում է «ՌԻԱ Նովոստի» գործակալությունը:



Հունվարի 13-ին երկու հզոր երկրաշարժ տեղի ունեցավ կղզում: Ստորգետնյա ցնցումների ուժգնությունը կազմեց 7 բալ Ռիխտերի սանդղակով: Տարերքը մեծ ավերածություններ գործեց Հաիթիի մայրաքաղաք Պորտ-օ-Պրենսում:

Զոհվածների հստակ քանակը հայտնի չէ: Տարբեր գնահատականներով զոհերի թիվը կարող է հասնել հարյուր հազարավորների: Տուժածների թիվը կհասնի շուրջ 3 միլիոնի:



1988թ. Սպիտակի երկրաշարժի ժամանակ, որը շուրջ 25 հազար մարդու կյանք խլեց, Ազնավուրը ֆրանսիական էստրադայի աստղերի հետ ձայնագրեց «Քեզ համար, Հայաստան» երգը, որի ողջ հասույթն ուղղվեց աղետի գոտու վերականգնմանը:



Շառլ Ազնավուրը ֆրանսահայ շանսոնյե է եւ դերասան: Նրա իսկական անունն է Շահնուր Վաղինակ: Ազնավուրը ծնվել է 1924թ. մայիսի 22-ին Փարիզում Հայոց ցեղասպանությունից մազապուրծ հայ գաղթականների ընտանիքում: Ազնավուրի մայրը ծագումով թուրքաբնակ հայ առեւտրականների ընտանիքից է, հայրը ծնվել է Ռուսաստանի կայսրության Թիֆլիսի նահանգում:



9 տարեկանից Ազնավուրը երգել է եւ հանդես է եկել բեմում, իսկ 1936-ին առաջին անգամ նկարահանվել է կինոյում: Սկզբնական շրջանում Ազնավուրը հանդես էր գալիս կոմպոզիտոր Պիեռ Ռոշեի հետ: Նրանց երկուսին նկատեց Էդիթ Պիաֆն ու 1946թ. նրանք մասնակցեցին Պիաֆի շրջագայությանը Ֆրանսիայում եւ ԱՄՆ-ում: Այդ ժամանակից ի վեր սկսվեց Ազնավուրի շանսոնյեի կարիերան: Սակայն վճռական բեկում երաժշտական Օլիմպում տեղի ունեցավ 1956թ.` Կասաբլանկայում եւ Փարիզում, որտեղ նա տեւական ժամանակ օրը երեք անգամ համերգներ էր տալիս «Օլիմպիա» հայտնի համերգասրահում: 1960-ականների սկզբին Ազնավուրը համերգներով հանդես եկավ Նյու Յորքի «Քարնեգի հոլ» եւ «Ambasador Hotel» համերգասրահներում, իսկ ավելի ուշ Ֆրենկ Սինատրայի «Reprise Records» ֆիրմայում թողարկեց իր առաջին ամերիկյան ալբոմը: Ազնավուրը շուրջ հազար երգերի հեղինակ է, որոնք կատարել եւ կատարում է ինչպես ինքը, այնպես էլ Ռեյ Չարլզը, Բոբ Դիլանը, Լայզա Մինելին, Խուլիո Իգլեսիասը եւ այլոք: Ազնավուրը դուետով հանդես է եկել Ֆրենկ Սինատրայի, Սելին Դիոնի, Լուչանո Պավարոտտիի, Պլասիդո Դոմինգոյի, Պատրիսիա Կաասի, Էլեն Սեգարայի հետ: Նա նկարահանվել է շուրջ 60 ֆիլմում եւ վաճառել է շուրջ 100 մլն սկավառակ: Ըստ «TIme» ամսագի եւ CNN-ի համատեղ հարցման (1998թ.) Ազնավուրը ճանաչվել է XX դարի լավագույն կատարող:



2008թ. դեկտեմբերի 26-ին Շառլ Ազնավուրն դարձավ Հայաստանի քաղաքացի: Նախագահ Սերժ Սարգսյանը հրամանագիր ստորագրեց քաղաքացիություն շնորհելու մասին ոչ միայն Ազնավուրին, այլ նաեւ նրա իմպրեսարիո Լեւոն Սայանին: 2009թ. մայիսի 5-ից Ազնավուրը Հայաստանի դեսպանն է Շվեյցարիայում եւ երկրի մշտական ներկայացուցիչը ՄԱԿ-ի կենտրոնակայանում: