Իսրայելական մամուլում շրջանառվող լուրերն այն մասին, որ Թուրքիան Իսրայելին համարում է ռազմավարական սպառնալիք ներկայացնող երկիր, անհիմն են և չարամիտ: Այդ մասին հայտարարել է Թուրքիայի ԱԳՆ ղեկավար Ահմեդ Դավութօղլուն: «Իսրայելական մամուլում հայտնված պնդումներում ոչ մի հիմնավորում չկա: Դրանք խաբեությունների և սադրանքների օրինակ են հանդիսանում»,- ասել է Դավութօղլուն:
Միաժամանակ նա հրաժարվել է ճշտել, թե իրականում Իսրայելն ընգրկված է Red Book-ի մեջ` որպես Թուրքիայի համար սպառնալիք ներկայացնող երկիր, նշելով, որ Red Book-ի պարունակությունը գաղտնի է:
«Անկարան ոչ մի հայտարարություն չի անի` ի պատասխան իսրայելական թերթերի հաղորդագրությունների: Մենք նպատակահարմար չենք համարում Իսրայելի հետ մշտապես վիճելը»,- ընդգծել է Դավութօղլուն, գրում է թուրքական Hurriyet թերթը:
Անցյալ շաբաթ Թուրքիայի Անվտանգության խորհուրդն ընդունել է Red Book (Կարմիր գիրք), որում ներկայացված են առաջիկա հինգ տարում Թուրքիայի պոտենցիալ դաշնակիցները և թշնամիները: «Կարմիր գիրքը» գաղտնի փաստաթուղթ է և հրապարակման ենթակա չէ: