Վահագն Չախալյանի պաշտպանության հանձնախումբը Հայաստանի և Վրաստանի նախագահներին կոչ է անում ազատ արձակել նրան

PanARMENIAN.Net - 2009թ. ապրիլի 7-ին Վրաստանի առաջին ատյանի դատարանի ակնհայտ օրինախախտումներով ուղեկցվող դատավարության արդյունքում Վահագն Չախալյանը դատապարտվել է 10 տարվա ազատազրկման մի շարք շինծու մեղադրանքներով, որոնք ուղղակիորեն առնչվում են Ջավախքի հայ բնակչության իրավունքների պաշտպանությանն ուղղված նրա քաղաքական և հասարակական գործունեությանը: Այդ մասին ասվում է Վրաստանի նախագահ Միխայիլ Սաակաշվիլու Հայաստան այցի կապակցությամբ Վահագն Չախալյանի պաշտպանության հանձնախմբի բաց նամակում: Նամակում նշվում է, որ Վահագն Չախալյանը այն ջավախքահայ գործիչներից է, որը հետևողականորեն հանդես է գալիս վրաց իշխանությունների կողմից ջավախքահայության նկատմամբ իրականացվող խտրական քաղաքականության դեմ: «Թեև նրա հանրային գործունեությունն ընթանում էր բացառապես օրինականության սահմաններում, սակայն ժողովրդի մեջ նրա հեղինակությունը և անկախ ու անկաշառ գործչի նրա համբավը ստիպեցին վրաց իշխանություններին կազմակերպել նրա չեզոքացման գործողությունը, որի արդյունքում նա այսօր բանտում է: Մենք կոչ ենք անում Հայաստանի և Վրաստանի նախագահներին քննարկել և արդարացի լուծում տալ Վահագն Չախալյանի խնդրին` անհապաղ նրան ազատ արձակելով»,- ասվում է հայտարարության մեջ, որը ստորագրել են Վահագն Չախալյանի պաշտպանության հանձնախմբի անդամները:

Վահագն Չախալյանը ձերբակալվեց 2008 թվականի ամռանը: Նրան մեղադրել են դիմադրության մեջ իշխանության ներկայացուցչին, զենքի և զինամթերքի ձեռքբերման և պահման, զանգվածային անկարգությունների կազմակերպման մեջ: Չախալյանի գործով դատավարության ընթացքում խախտումները մատնանշվել են ինչպես հայկական հասարակական կազմակերպությունների, այնպես էլ Վրաստանի Մարդու իրավունքների պաշտպանի կողմից: Չախալյանի փաստաբանները որոշել են պաշտպանել նրա շահերը ցանկացած ատյաններում` ընդհուպ մինչև Մարդու իրավունքների եվրոպական դատարան: