Moody’s-ը կվերանայի 177 բանկային կազմակերպությունների վարկային վարկանիշերը 46 երկրներում

PanARMENIAN.Net - Moody’s միջազգային վարկանիշային գործակալությունը մոտակա ինն ամիսների ընթացքում մտադիր է վերանայել 177 բանկային կազմակերպությունների վարկային վարկանիշերը 46 երկրներում: Ընկերությունում չեն բացառում, որ շատ բանկերի վարկանիշերը այդ վերագնահատմամբ կիջեցվեն:

Ղեկավարությունը նման որոշում է ընդունել այն առիթով, որ աշխարհում գնալով ավելի շատ ֆինանսական կարգավորիչներ են հայտարարում խորտակվող բանկերի փրկության համար պետմիջոցներ օգտագործել չցանկանալու մասին: Դրա փոխարեն նրանք առաջարկում են նման ծախսերը բաշխել բանկային պարտատոմսեր տնօրինողների և այլ ներդնողների միջև, որոնք ընկերությանը փոխ առած միջոցներ են տրամադրել:

«Վարկանիշերի իջեցում է սպասվում բոլոր բանկերին` առանց հաշվի առնելու դրանց ծավալը, քանի որ զարգացած երկրներում բանկային հատվածի հիմնական խնդիրներից մեկը վերջին տարիներին եղել է ընկերությունների սեփական կապիտալի անբավարարությունը: Կարծում եմ, որ վարկանիշը կկորցնեն հիմնականում եվրոպական բանկերը, քանի որ նրանց ամերիկյան մրցակիցները վերջին երկու տարիների ընթացքում հսկայական աշխատանքն են կատարել այդ ուղղությամբ, ներառյալ բազմաթիվ միաձուլումները, ինչպես նաեւ պարզապես սեփական կապիտալի ավելացումը»,- ասել է Egan Jones վարկանիշային գործակալության նախագահ Շոն Իգանը:

Հայաստանյան բանկերից Moody’s-ը վարկանիշեր է շնորհել «Հայէկոնոմբանկին», «Արդշինինվեստբանկին», «Յունիբանկին» եւ «Պրոմեթեյ Բանկին»: