Լևոն Զուրաբյանը Ստեփան Սաֆարյանին անվանել է «բարոն Մյունհաուզեն»

PanARMENIAN.Net - Հայ ազգային կոնգրեսի համակարգող Լևոն Զուրաբյանը «Ժառանգություն» խորհրդարանական խմբակցության ղեկավար Ստեփան Սաֆարյանի հայտարարությունը ՀԱԿ առաջնորդ Լևոն Տեր-Պետրոսյանի մասին անվանել է սուտ և համեմատել է նրան բարոն Մյունհաուզենի հետ: Այդ մասին նա հայտարարել է Երևանում կայացած մամլո ասուլիսւոմ: «Ով հավատում է բարոն Մյունհաուզենին, թող հավատա»,-ասել է նա: Ըստ Զուրաբյանի, Սաֆարյանի հայտարարության սուտ լինելու մասին վկայում է նաև այն հայտարարությունը, թե իբր Սաֆարյանը տեսել է նրան 2008թ. մարտի 1-ին Լևոն Տեր-Պետրոսյանի տանը, այն դեպքում, երբ նա կարողացել է մտնել Լևոն Տեր-Պետրոսյանի մոտ միայն գիշերվա ժամը երկուսին՝ անցնելով ոստիկանության պատնեշները: ՀԱԿ-ի համակարգողը հավելել է, որ Սաֆարյանի բոլոր ասածները սուտ են և նա չի ցանկանում պատասխանել նրա հայտարարությանն առնչվող հարցերին:

Հայ ազգային կոնգրեսի առաջնորդ, Հայաստանի առաջին նախագահ Լևոն Տեր-Պետրոսյանը քաղաքական պատասխանատվություն է կրում 2008թ. մարտի 1-ի ողբերգական իրադարձությունների ժամանակ տասը մարդկանց մահվան համար: Այդ մասին Facebook սոցիալական ցանցում հայտարարել է «Ժառանգություն» ընդդիմադիր կուսակցության խորհրդարանական խմբակցության ղեկավար Ստեփան Սաֆարյանը: Նա ընդգծել է, որ Լևոն Տեր-Պետրոսյանը պարտավոր էր կանխատեսել Մյասնիկյանի անվ. հրապարակում դեպքերի զարգացումը և կամ անձամբ ներկա գտնվել այնտեղ, կամ էլ հավաքված մարդկանց տուն ուղարկել: Սաֆարյանը նշել է նաև, որ 2008 թվականի մարտի 1-ի առավոտյան Տեր-Պետրոսյանի մամլո ասուլիսից հետո ինքը նախկին նախագահին հաղորդեց, որ ժողովուրդը հավաքվել է Մյասնիկյանի անվ. հրապարակում, և որ այնտեղ բախումներ են տեղի ունենում ոստիկանության հետ, սակայն Տեր-Պետրոսյանը պատասխանեց. «Դա իմ ժողովուրդը չէ»:

Ամփոփելով իր խոսքը` Սաֆարյանն ավելացրել է, որ ինքը հասկանում է, թե թե ինչպիսի ալիք է բարձրանալու իր գրառումից հետո, սակայն պատրաստ է դրան դիմակայել: