Գյումրեցիները կրկին բողոքում են Մինասի որմնանկարները Երևան տեղափոխելու համար

PanARMENIAN.Net - Գյումրիից Մինասի որմնանկարների Զվարթնոց օդանավակայան տեղափոխման նախաձեռնությունը բուռն բողոքի ալիք է բարձրացրել Գյումրիում: Հունիսի 8-ին «Մինաս Ավետիսյան» բարեգործական հիմնադրամի պատասխանատուները իտալացի մասնագետի հետ միասին «Գալվանոմետր» գործարանի մասնաշենքում գտնվող «Թել են մանում» որմնանկարի պատից անջատման աշխատանքներ իրականացրեցին: Այնուհետև նախատեսվում էր, որ պատից անջատված որմնանկարները, փաթաթված վիճակում պետք է տեղափոխեին Երևան, սակայն բազմաթիվ գյումրեցիների բողոքի և Մինասի Ավետիսյան հիմնադրամի ղեկավար Արման Ավետիսյանի հետ բանակցությունների արդյունքում որոշվեց, այնուամենայնիվ, որմնանկարներն այդ օրը չտեղափոխել:

Որմնանկարը փաթաթված վիճակում տեղափոխվեց նույն գործարանի պահեստային մաս, որից հետո դռները կողպվեցին քաղաքացիական հասարակության կառույցների կողմից տրամադրված փականով:

Այս հարցի շուրջ PanARMENIAN.Net ի թղթակցի հետ զրույցում Մինաս Ավետիսյանի որդի Նարեկ Ավետիսյանը դեռ մայիսի 12-ին ասել էր, որ թյուր կարծիք է ձևավորվել հասարակության մոտ, որ դա քաղաքականություն է Գյումրիից մշակութային արժեքների գողացման համար: «Ես, իմ եղբայրը և մայրս միշտ էլ կապված ենք եղել Գյումրի քաղաքի հետ, և մենք դեմ չէինք լինի, որ այն մնար այնդեղ: Գյումրեցիները բազմաթիվ հնարավորություններ են ունեցել որմնանկարներն իրենց քաղաքում պահելու համար, սակայն նրանք ոչինչ չարեցին, իսկ այժմ, երբ Կառավարությունը որոշել է այն ռեստավրացիայի ենթարկել, նրանք դժգոհում են»:

Նա նաև ասաց, որ այժմ լավ հնարավորություն է Մինասին օտարերկրյա այցելուներին ներկայացնել, քանի որ «Զվարթնոց» օդանավակայանի մեկնման սրահում բոլորն անխտիր այն կտեսնեն: